HAPPY BIRTHDAY MALA.....

pl.click the link below

CLICK       REVOLVES AROUND YOU

to see/hear  " I amma Barbie girl song with Mala & JP " posted last birthday click        here

ஏழாம் சுவை - நகைச்சுவை - 6

- அறு(சு)வையா​னந்தா

ஜி யைச் சந்திக்கச் சென்றபோது அவரே ஆரம்பித்தார் -

" நமது சங்கத்தில் நடைபெற்ற மனைவி நல வேட்பு நாள் விழாக்களில் கலந்துகொண்டேன். மிகவும் மகிழ்ச்சியும், நிறைவும் சிலருக்கு நெகிழ்வும் தந்ததாக அமைந்திருந்தது. நிறைய குடும்பங்களில் அமைதியையும், ஒற்றுமையையும் ஏற்படுத்த இந்த விழா எல்லா இடங்களிலும் நடைபெற வேண்டும் " என்றார்.

" இந்த மாதமும் பல இடங்களில் நடக்க இருக்கின்றது ஜி " என்றோம்.

"  கணவன் மனைவிகளிடையே ஒருவர் மற்றவரிடம் காணும் குறைகளே பல பிரச்சனைகளை உருவாக்கிவிடுகின்றது.  இந்த குறைகள் பட்டியலில் முதல் பத்து இடங்களைப் பிடிப்பது -

1. சுயநலம்

2. ஊதாரித்தனமான செலவு

3. வம்பு பேசுதல்

4. சீண்டிக்கொண்டே இருத்தல்

5. வீட்டில் கவனமின்மை

6. ஆதிக்க மனப்பான்மை

7. வெளிவிவகாரங்களில் அதிக அக்கறை

8. சுத்தமின்மை

9. இன்னொரு ஆணிடமோ, பெண்ணிடமோ ஈடுபாடு   &

10. அலட்சியப்படுத்தல்

இவ்வளவு குறைகளுக்கிடையே பொறுமை, சகிப்புத்தன்மை மற்றும் தியாகம் இவற்றைக் கடைப்பிடித்து வாழ்வை சீர் செய்து வாழும் மனமொத்த தம்பதிகளை பார்க்கின்றோம் அல்லவா! இவர்களும்  அவ்வப்போது சண்டை  சமாதானமாகி வாழ்க்கைக்கு மேலும் சுவை  ஊட்டுவார்கள். இதை உணர்த்தத்தான் நமது முன்னோர்கள் புராணங்களிலே தெய்வீகத்  தம்பதியர்களான சிவன் - பார்வதி, விஷ்ணு - லட்சுமி, பிரம்ஹா - சரஸ்வதி

இவர்கள் சண்டை போட்டுக் கொண்டு பிறகு சமாதானம் அடைந்து உலகுக்கு சில நீதிகளைப் போதித்ததாக கதைகள் அமைத்தனர் " என்றார் ஜி.

" கணவன் - மனைவியருக்கு நீங்கள் தரும் அறிவுரை என்ன ஜி ?" எனக் கேட்டோம்.

" கணவன் மனைவி இருவருமே தங்களிடையே வரும் சண்டைகளை ஊடலாக நினைத்து உடனே சரி செய்ய வேண்டும். இம்மாதிரி சண்டைகளில் கோபத்தைத் தவிர்த்து மன்னிப்புக்கு அதிக முக்கியத்துவம் கொடுக்க வேண்டும். மனைவி தன்னிடம் மன்னிப்பு கேட்க வேண்டும் என்று கணவன் எதிர்பார்க்கக்கூடாது. சண்டையிலே மனைவியை வெல்ல அனுமதித்து கணவன் தோற்க வேண்டும். அப்படித் தோற்ற கணவர்கள்தான் வெற்றிகரமான குடும்பத் தலைவர்களாக திகழ்கின்றார்கள். ஏனெனில்

'வெற்றி'  பெற்ற மனைவி 

கணவனிடம் தன உள்ளத்தைப் பறிகொடுத்து 

அவன் சொல்கேட்கும் 

அன்பு அடிமையாக 

மாறிவிடுகின்றாள்!"

என்று முடித்தார் ஜி.

"நீங்கள் சொல்லும் ஜோக்குகளுக்கு சிரித்துவிட்டு செல்ல வந்த எங்களுக்கு, ஏன் எல்லோருக்குமே உபயோகமான அறிவுரை தந்தீர்கள் ஜி! மிக்க நன்றி. 

நிறைவாக ஒன்றிரண்டு ஜோக்ஸ் ப்ளீஸ்.." எனக் கேட்டோம்.

" ஓ..இந்தப் பகுதியே அதற்காகத்தானே...உங்களுக்காக கணவன்-மனைவி ஜோக்ஸ் -

  கணவன் குடும்பத்துக்கு தலை மாதிரிதான். ஆனால் மனைவி என்பவள் கழுத்து மாதிரி. கழுத்தின் அனுமதி இன்றி தலையை எந்த பக்கமும் திருப்ப முடியாது.

*************************************

டாக்டர்: "மேடம்... உங்க கணவருக்கு மனஅழுத்தம் அதிகமாயிடுச்சு. நல்லா சமைச்சு போடுங்க, சண்டை போடாதீங்க, உங்க பிரச்சனைகளை சொல்லாதீங்க. டிவி சீரியல் பத்தி பேசாதீங்க, எப்பவும் சந்தோஷமா பாத்துக்குங்க."

வெளியே வந்த மனைவியிடம்  கணவன்: "டாக்டர் உன்கிட்ட என்னம்மா சொன்னாரு?"

 மனைவி: "நீங்க பிழைக்க வாய்ப்பே இல்லைன்னு சொல்லிட்டாரு...."

********************************************

  " வேலைக்காரனுக்கு உங்க சட்டையை குடுக்காதீங்கன்னு சொன்னாக் கேக்குறீங்களா? "

   "  என்ன ஆச்சு ?"

   "  இன்னைக்கு நீங்கதான்னு நினைச்சு..."

   "  அய்யய்யோ!  என்ன ஆச்சு ? "


   "  அவனை பூரிக்கட்டையால அடிச்சிட்டேன் ."

****************************************************

ஏழாம் சுவை - நகைச்சுவை - 5

 - அறு(சு)வையா​னந்தா

'ஜி'யை சந்திக்கச் சென்றிருந்தபோது அவரை காண வந்திருந்த இரு உயரதிகாரிகளை சந்தித்தோம். அவர்கள் 'ஜி'யின் கீழ் பணிபுரிந்தவர்களாம். அவர்களிடமிருந்து

 தெரிந்துகொண்ட  விஷயங்கள்  -

* எவ்வளவு டென்ஷனாக வேலை இருந்தாலும் தன்  நகைச்சுவை உணர்வால் அந்த வேலையை எளிதாக்கி, சீக்கிரமாகவும், சிறப்பாகவும் செய்து முடிக்க ஜி உதவுவார்.

* ஜி யுடன்  வேலை செய்பவர்கள் குழு மனப்பான்மையுடன் உற்பத்தி திறனை அதிகப் படுத்துவார்கள்.

* இதனால் ஜி யுடன் ஏற்பட்ட அன்புபிணைப்பால்தான் அவரை அடிக்கடி காண வருகின்றோம்.

அந்த அதிகாரிகள் ஜி யுடன் பேசிவிட்டு சென்ற பிறகு நாங்கள் இன்றைய அலுவலகம் மற்றும் வேலை செய்யும் இடங்கள், வேலை பளு இவற்றைப் பற்றி பேசினோம்.

" இன்றைய அவசர யுகத்தில், போட்டிகளும், சவால்களும் நிறைந்த சூழ்நிலையில், 12 மணி நேரத்திற்கு மேல் வேலை பார்க்க வேண்டிய கட்டாயத்தில் அனைவருக்குமே  எப்போதும் டென்ஷன்தான். கொஞ்சம் குரலை உயர்த்தி ஆணையிட்டால்கூட ஊழியர்கள் உணர்ச்சி வசப்பட்டு பிரச்சனைகளை உண்டாக்கிவிடுகின்றார்கள். இந்த மாதிரி நேரத்தில் சிரிக்கபேசி, அவர்களை புதிய கோணத்தில் சிந்திக்க உதவுவேன். வேலைகள் சிறப்பாக முடியும் " என்றார் ஜி.

" எங்களுக்கு சில சுவையான சம்பவங்கள் கூறமுடியுமா? " எனக் கேட்டோம்.

" நிறைய சொல்லலாம். முப்பது ஆண்டுகளுக்குமுன் நான் பணிபுரிந்த இடத்தில் ஆண்டு ஆய்வுக்காக உயரதிகாரி வருவதாக செய்தி வந்தது. அந்த அதிகாரி மிகவும் கண்டிப்பானவர், மிகவும் சிடுசிடு என இருப்பார் என்பதால் எல்லோருக்கும் பயம். அவர் வருவது பற்றி ஒரு தந்தி வந்தது. அதைப் படித்ததும் எல்லோருக்கும் ஒரே சிரிப்பு  - அதில் ' coming by morning 5 O ' clock train . send office keep ' என இருந்தது. தந்தியில் jeep என்பது keep என இருந்ததால் அர்த்தமே மாறிவிட்டது. அந்த அதிகாரி ஆய்வுக்கு வந்தபோது அந்த தந்தியைக் காட்டினோம். அதைப் பார்த்துவிட்டு அவர் சிரித்த சிரிப்பில் எங்களுக்கு எல்லா பயமும் போய்விட்டது.

" இப்போது வந்து சென்றார்களே, அவர்கள் என்ன புலம்பினார்கள் தெரியுமா..அவர்களுடைய boss விரட்டி, விரட்டி வேலை வாங்குகிறாராம்.கேட்டால் தனக்கு மேலே இருக்கும் மூன்று முட்டாள் அதிகாரிகள் உடனடியாக விவரங்கள் கேட்டு தன்னை விரட்டுகிறார்கள் என்கிறாராம். நான் சொன்னேன் - ' நீங்கள் உங்கள் bossஸிடம் என்ன சொல்லியிருக்கவேண்டும் - உங்களுக்குமேல் மூன்று முட்டாள்கள்தான். ஆனால் எங்களுக்கு மேல்   நான்கு முட்டாள்கள் இருக்கிறார்களே  என்று'.     இப்படி சொல்ல முடியாவிட்டாலும் கொஞ்சம் இப்படியெல்லாம் சிந்தித்து, சிரித்து அழுத்தத்தைக் குறைத்துக் கொள்ளலாம்" என்றார் ஜி.

மேலும் சொல்லுங்கள் ஜி " என வேண்டினோம்.

" Humour at Workplace "  என பல பத்திரிகைகளில் உண்மை நகைச்சுவை நிகழ்சிகள் வெளிவருகின்றன.  இன்றைக்கு நகைச்சுவை உணர்வு உள்ள அதிகாரிகளையும், சக ஊழியர்களையும்தான் எல்லோரும் விரும்புகிறார்கள்.  பேச்சாளர்களில்கூட  நம்மை அதிகம் சிரிக்க வைப்பவர்களைத்தான் நாம் விரும்புகிறோம் அல்லவா....எனவே முதலில் நம்மை வைத்தே நாம் காமெடி செய்துகொள்வது  நம்மை பாபுலராக்கிவிடும்" என்கிறார்  ஜி.

" என்னைவச்சு யாரும் காமெடி, கீமெடி பண்ணுலையே ... அப்படின்னு கேக்காம நம்மகிட்ட இல்லாத விஷயத்தை உணர்ந்து நம்மை நாமே கமெண்ட் அடித்துக் கொண்டு நாமே சிரிக்கணும் என்று சொல்கிறீர்கள் , இல்லையா ஜி " என நாம் கேட்க

" ஆமாம். ஈகோ இல்லாத ஆள் என்ற இமேஜ் நம் மீது விழுந்து நம் மேல் மரியாதை கூடும் " என்கிறார் ஜி.

  எங்கள் உரையாடலின்போது ஜி சொன்ன சில அலுவலக ஜோக்குகள் -

*******************************
 “இன்னைக்கு நான் ஆபீஸ்ல பட்டினி கிடந்து
வேலை செஞ்சேன்”

“அவ்வளவு பிசி ஒர்க்கா?”


“இல்ல; சாப்பாட்டு நேரத்தில என்னை யாரும்
எழுப்பிவிடலை”

********************************************

"உங்க ஆபீஸ்ல எல்லாரும் எப்படி இருக்காங்க?"

 "படுத்த   படுக்கையா!"  

**************************

இன்னைக்கு வெயில் ரொம்ப அதிகமா இருக்கு... நீங்க ஆபீஸ் போக வேண்டாங்க!"

"என்னை நம்பு செல்லம்... சத்தியமா எனக்கு வத்தல் போடத் தெரியாது!"


********************************

நானும் என் மனைவியும் ஒரே ஆபீஸ்ல வேலை செய்யுறோம்..."

அப்ப ஆபீஸ்லகூட உங்களால நிம்மதியா தூங்கமுடியாதுன்னு சொல்லுங்க..

ஏழாம் சுவை - நகைச்சுவை - 4

ஏழாம் சுவை - நகைச்சுவை 

- அறு(சு)வையானந்தா 

" ஜி, உங்கள் ஏழாம் சுவையைப் படித்த நிறைய அன்பர்கள்  நகைச்சுவையை நன்கு அனுபவித்தோம் என்று தெரிவித்திருக்கின்றார்கள். அதில் ஒர்  அன்பர் ஏழாம் சுவையில் ' அசைவம் ' உண்டா என்று கேட்டிருக்கின்றார்  "என்றதும்

" உணவுக்காக உயிர்கொலை கூடாது என்று ஐந்தொழுக்கப் பண்பாட்டில் வாழும் நாம் நகைச்சுவையிலும் அசைவம் தவிர்ப்பது மிக நல்லது " என்ற ஜி,

" ஒரு முறை மகரிஷி அவர்கள் கருவாட்டினைப் பற்றி நகைச்சுவையாகச் சொன்னார்கள் - " என்று ஒரு சம்பவத்தினை ஜி சொல்ல ஆரம்பிக்கின்றார்.

" 1980ம் ஆண்டு மகரிஷி முதன்முறையாக திருச்சி வந்திருந்தார்கள். கூடவே அழியாரில் அருள் அரங்கு கட்டுவதற்கு உதவிய திருமதி இந்திரா குப்தா  அவர்களும், அமெரிக்க அருள்நிதி  டோனி சதானந்  மற்றும் மகரிஷிக்கு உதவியாக  திருமதி ஓமனா அவர்களும் வந்திருந்தார்கள். திருச்சி மத்தியப் பேரூந்து நிலையம் அருகே உள்ள தமிழ்நாடு இல்லத்தில் தங்கியிருந்தார்கள். ஒருநாள் மாலையில் எல்லோருமாக பேரூந்து நிலையம் அருகே நடந்து சென்று கொண்டிருந்தபோது சைக்கிளில் வந்த ஓர் இளைஞன் அந்த பகுதியில் இருந்த திரைப்பட கவர்ச்சிப் படத்தைப் பார்த்துக்கொண்டே அங்கிருந்த போலீஸ்காரர் மீது மோதிவிட்டான். அன்றிரவு  மகரிஷியிடம் இந்த கவர்ச்சி பற்றி பேசிக்கொண்டிருந்தபோது மகரிஷி அவர்கள்  ' கவர்ச்சி என்பது எல்லா பொருள்களிலும் இருக்கிறது. எந்த புலனை அது அதிகம் கவர்கிறது என்பதில்தான் நாம் விழிப்புடன் இருக்கவேண்டும். உதாரணமாக கருவாடு இருக்கிறதே அது பார்ப்பதற்கு அழகாகவா இருக்கிறது? அதன் நாற்றமும் நமக்கு பிடிப்பதில்லை. ஆனால் கருவாடு சாப்பிடுபவர்களிடம் அதன் சுவையை கேளுங்களேன். சப்புகொட்டிக்கொண்டு அதன் சுவையைப் பற்றி பேசுவார்கள். எனவே கருவாட்டின் கவர்ச்சி அதன் சுவையிலே'. என்று மிக  எளிமையாக  நகைச்சுவையுடன் கவர்ச்சி பற்றி விளக்கியது என்றுமே மறக்க முடியாது" என்கிறார் ஜி.

" ஜி, மகரிஷி சொன்ன நகைச்சுவைகள் பற்றி மேலும் சொல்லுங்கள் " என்று நாம் கேட்க

" முதன்முறையாக ஆழியார் அறிவுத்திருக்கோவிலில் கம்ப்யூட்டர் இணைத்தபோது  மகரிஷி எல்லாவற்றையும் ஆர்வமாக கவனித்து, எப்படி இயக்குவது என்பதையெல்லாம் கேட்டு தெரிந்துகொண்டார். ' இதுதான் சாமி, மவுஸ்'. என்றதும் உடனே மகரிஷி அவர்கள் ' ஒ! அதுதான் கம்ப்யூட்டருக்கு மவுஸ் கூடிகிட்டேபோவுது!' என்று நகைச்சுவையுடன் சொன்னதும் ஞாபகத்திற்கு வருகின்றது" என்கிறார் ஜி.

" ஜி, இன்னொன்று சொல்லுங்கள் " என்று நாம் கேட்க

" ஒருமுறை திருவான்மியூர் தலைமை மன்றத்தில் மகரிஷி அவர்களுடன் உரையாடிக்கொண்டிருந்தபோது ஜென் புத்திஸம்  பற்றி பேச்சு வந்தது. நான் ஒரு குறிப்பிட்ட ஞானி பற்றியும், அவர் ஜென் கதைகள்  மூலமாக  புத்திஸம் பற்றி எளிதாக விளக்குகிறார் என்பதைப் பற்றியும் சொன்னதும்   மகரிஷி அவர்கள் ' புத்திஸம் நல்லதுதான். ஆனால் நீங்கள் சொல்பவர் அதில் புத்தியில்லா இசத்தையும் கலந்துவிடுகிறாரே!' என்று  உடனே சொன்னது  மகரிஷியின் நகைச்சுவையுணர்வினை மேலும், மேலும் வியக்க வைத்தது"  என்கிறார் ஜி.

" இன்னொன்று சொல்லுங்கள், ஜி!"  என்று நாம் கேட்க அவரோ

" தென்கச்சி சுவாமிநாதன் அவர்கள் தொகுத்துள்ள ' மகரிஷியின் நகைச்சுவையுணர்வு' புத்தகத்தில் படித்துக்கொள்ளுங்கள் "  என்று சொல்லி " இன்றைக்கு இவ்வளவு போதும் " என்று 
முடித்துக் கொள்கிறார்  ஜி.

வாழ்க வளமுடன் or வாழ்க வளத்துடன்...... எது சரி...?

’வாழ்க வளமுடன்!’ 

என்று கூறுவது தவறா? 

இலக்கணம் என்ன சொல்கிறது?

- பேராசிரியர் பெருந்தகை அமரர் அ /நி K G சாமி ஐயா 

நமது இயக்கத்தில் வாழ்க வளமுடன் என்கின்ற ஒரு தாரக மந்திரத்தை நமது அருள் தந்தை அவர்கள் உருவாக்கிச் சேர்த்திருக்கிறார். இது மனவளக்கலைஞர்களாகிய நம்மால் எந்த நேரமும் பயன்படுத்தப்படுகிறது. அது அற்புதங்களையெல்லாம் சாதித்திருக்கிறது என்பது நமக்குத்தான் தெரியும். அதனிடம் வசீகரம் எவ்வளவு இருக்கிறதென்றால், நமது இயக்கத்தைச் சாராதாரும் இந்த வாழ்த்து வாசகத்தை மகிழ்ச்சியோடும் வெற்றியோடும் பயன்படுத்தி வருகிறார்கள். வீட்டு வாசலில் எழுதிக் கொள்கிறார்கள். ஸ்டிக்கர் ஒட்டுகிறார்கள். கோலம் போடுகிறார்கள். வாகனங்களில் எழுதி கொள்கிறார்கள். இன்னும் சினிமாவிலும் கூட வணக்கம் போடுவதற்குப் பதிலாக இதனைப் பயன்படுத்துகிறார்கள்.

நல்ல விஷயம் ஒன்று எங்கே உருவானாலும், அதனால் விளையும் நன்மைகளைக் கண்டு பொறாமைப்படுவோர்களும் சமுதாயத்தில் இன்னும் இருக்கத்தான் செய்கிறார்கள். அவர்கள் இந்த வாழ்த்து வாசகத்தில் இலக்கணப் பிழை ஏதும் இருக்காதா என்று ஏக்கத்தோடு துருவி துருவிப் பார்க்கிறார்கள்.

1970 – களில் நான் சந்தித்த எனது தமிழாசிரிய நண்பர் ஒருவர், “வாழ்க வளமுடன் என்று சொல்வது இலக்கணப் பிழை. வாழ்க வளத்துடன் என்று சொல்வது தான் இலக்கணப்படி சரி. வேதாத்திரி மகரிஷியாகிய ஒரு நல்ல பெரியவர் இவ்வாறு தமிழை இளக்காரமாக நினைக்கலாமா?” என்று கேட்டார். எனது அறிவைக் கொண்டு அவருக்கு உடனடியாக மறுப்பு ஏதும் என்னால் சொல்ல முடியவில்லை என்றாலும் பின்வருமாறு சொன்னேன்.

’பெரியவர்கள் தவறு செய்ய மாட்டார்கள். எங்கள் வேதாத்திரி மகரிஷி அவர்கள் நீண்ட காலம் தவம் செய்த ஒரு ஞானி. அவர் ஒன்று சொல்வதில் தவறு இருக்க முடியாது. அதிலுள்ள இலக்கண நுட்பத்தைப் பற்றி சட்டென்று எனக்குச் சொல்லத் தெரியவில்லை யோசித்துப் பார்க்கிறேன். என்றாலும், இதற்கு இலக்கணப்பூர்வமாக அமைதி இருக்கும் என்றே எனக்குத் தோன்றுகிறது. இது போல் வேறு யாராவது பெரியவர்கள் சொல்லியிருந்தால், அதாவது அம் ஈற்று பெயர்ச் சொல்லுக்குப் பின்னால் வேற்றுமை உருபு வந்தால் அம் கெட அத்துச் சாரியை தோன்றி, அதன் பிறகு உருபு வேற்றுமையுருபு புணரும் என்ற இலக்கண விதிக்குப் புற நடையாக, விதி விலக்காக யாராவது முன்னமேயே பெரியவர்கள் இலக்கியத்தில் அத்துச் சாரியை சேர்க்காமல் எழுதியிருக்கிறார்களா என்று ஆராய்ந்து பார்த்து வருகிறேன். அப்படி யாராவது பெரியவர்கள் அத்துச் சாரியை இல்லாமல் எழுதியிருந்தால் நீங்கள் என்ன சொல்லுகிறீர்கள்?

அதற்கு அந்த ஆசிரியர், அப்படி யாரும் பெரியவர்கள் பிழையே செய்திருக்கமாட்டார்கள் என்று சாதித்தார். நான் என் மனதை அமைதி நிலையில் வைத்துக் கொண்டு வீட்டுக்குச் சென்று திருக்குறளை எடுத்துத் திறந்தேன். கண்ணோட்டம் என்ற அதிகாரம் வந்தது. அதில் முதல் குறளிலேயே எனக்குச் சான்று கிடைத்து விட்டது. அந்தக் குறள் வருமாறு:-

      கண்ணோட்டம் என்பது உலகியல் அஃதிலார்

      உண்மை நிலக்குப் பொறை.

கண்ணோட்டம் என்ற உயர்ந்த பண்பு இல்லாதவர்கள் பூமிக்குப் பாரமாவார்கள் என்பது இதன் பொருள். இங்கே பூமி என்ற பொருள் பட, நிலம் என்ற சொல்லை வள்ளுவர் கையாண்டு இருக்கிறார். நிலம் என்ற சொல்லொடு கு என்ற வேற்றுமையுருபு ஏறுகிறது. எனது நண்பர் சொல்வது தான் சரியென்றால், நிலம் + கு = நிலத்தக்கு என்று வர வேண்டும். ஆனால் வள்ளுவரோ, அத்துச் சாரியை விட்டு விட்டு, நிலக்கு என்று எழுதியிருக்கிறார். எனவே மிகப் பெரியவர்கள் ஒரே வழி இலக்கணத்தை மீறாமல் என்ற எனது கருத்து வலுப்பெற்றது.

மறுநாள்எமது ஆசிரிய நண்பரிடம் திருக்குறளைக் கொண்டு போய்க் காட்டியபோது, அவர் வாயடைத்துப் போனார். ‘வேதாத்திரி மேல் குற்றம் சொன்னால் அது வள்ளுவர் மேல் போய் விழுகிறதே!’ என்று அவர் மிரண்டு போனார். பிறகு இந்த விஷயத்தை யாரும் இழந்துப் பேசி நான் கேட்டது இல்லை. ஆனால், தற்போது ஏதோ ஒரு வாரப் பத்திரிக்கையில் இதே குற்றத்தை மகரிஷி மேல் சுமத்தி இருப்பதாக நண்பர் ஒருவர் சொன்னார். அந்த வார இதழை எனக்குக் காட்டினார். நமது வாசகர்களும் அதைப் பார்த்திருக்கலாம். மனம் வருந்தியும் இருக்கலாம்.

இதைப் பற்றி ஒரு தமிழாசிரியரிடம் பேசிக் கொண்டிருந்த போது, அவர் என்னை அதிசயமாகப் பார்த்து வாழ்க வளமுடன் என்பது இலக்கணப்படியே சரிதானே என்று கூறி, அதற்கு நன்னூல் சூத்திரமும் குறிப்பிட்டார்! அதன் விவரம் பிறகு கூறுகிறேன். தோன்றக் காரணமாகவும், இருக்க இடமாகவும் அவைகளை தாங்குகின்ற, இயக்குகின்ற சக்தியாகவும், ஒளி, ஒலி, அழுத்தம் என்ற மூன்று விதமான எழுச்சியியக்கத்தைப் பிரபஞ்சம் முழுவதுக்கும் வியாபிக்கச் செய்கின்ற பெரு வல்லமை பொருளாக அறிவு விளங்குகிறது. பொருள் என்றே கூற முடியாத படி, புலன்களுக்கெட்டாமல், தான் அசையாத் தன்மையதாய் உள்ள பேராதாரப் பெரு வெளியில், மனதுக்கு இதுவரையில் எட்டியவகைகளாகவும், இன்னும் எட்டாதவைகளாகவும் உள்ள எல்லா ரகசியங்களும் அடங்கியுள்ளன. எது சரி...?

’வாழ்க வளமுடன்!’ என்று கூறுவதில் இலக்கணக் குற்றம் இல்லை. ‘வளம்’ என்ற மகர ஈற்றுப் பெயர்ச்சொல்லிற்கு பிறகு ‘உடன்’ என்ற மூன்றாம் வேற்றுமை உருபு சேருகின்ற பொழுது இடையில், ‘அத்து’ச் சாரியை சேர்க்க வேண்டியது அவசியமில்லை என்று ஜனவரி 2001 இதழில் பார்த்தோம். அதற்கு, ‘கண்ணோட்டம் உள்ளது உலகியல் அஃதிலர் உண்மை நிலக்குப்பொறை’, என்ற குறளையும் மேற்கோளாகக் கொடுத்திருந்தோம். மேற்படிக் கட்டுரையில் சொல்லியிருந்த தமிழாசிரியர் அக்கட்டுரை வெளிவந்த பின் அதைப் படித்து விட்டுத் திருக்குறளில் மகர ஈற்றுப் பெயர்ச்சொல்லுடன் அத்துச் சாரியைச் சேர்க்காமல் வேற்றுமையுருபை ஏற்றி எத்தனையோ குறள்கள் இருக்கின்றனவே. இதோ என்று, ‘நலக்குரியார் யாரெனின் நாமநீர் வைப்பில் – பிறற்குரியாள் தோள்தோயா தார்’, மற்று ‘கல்லார்ப் பிணிக்கும் கடுங்கோல் அதுவல்லது – இல்லை நிலக்குப் பொறை’ இரண்டு குறள்களைக் கூறினார்.

மேலும் அந்தத் தமிழாசிரியர் அத்து முதலிய சாரியைகளை தவிர்க்கவும் செய்யலாம் என்பதற்கு பின்வரும் நன்னூல் சூத்திரத்தையும் குறிப்பிட்டார். ‘பதமும் விகுதியும் பதமும் உருபும் – புணர்வழி ஒன்றும் பலவும் சாரியை – வருதலும் தவிர்தலும் விகற்பமும் ஆகும்’.

மகர ஈற்றுப் பெயர்ச் சொற்களோடு வேற்றுமையுருபைச் சேர்க்கும் போது அத்துச் சாரியையும் சேர்க்க வேண்டியதில்லை என்பதற்கு இலக்கண ஆசிரியரான நன்னூலாரை விட வேறு யாரிடம் போய்ச் சான்று கேட்க முடியும்.

’வாழ்க வளமுடன்’ என்று கூறுவது தவறு என்பதில் எனக்கு இன்னொரு அனுபவமும் ஏற்பட்டிருந்தது. 1980 களின் ஆரம்ப ஆண்டுகளில் ஒரு சமயம் சென்னைத் திருவான்மியூர் தலைமை மன்றத்திற்கு மகரிஷிகளைப் பார்க்கச் சென்றிருந்தேன். அங்கு நமது மனவளக்கலைப் பேராசிரியர் புலவர் கே. தியாகராஜன் தங்கியிருந்தார். அவரைப் பார்க்க அவரறைக்குச் சென்றேன். அவருடன் ஒரு பெரிய தமிழ் பண்டிதரும் தங்கியிருந்தார். இருவரும் தமிழ் ஆராய்ச்சி செய்து கொண்டிருந்தனர்.

நான் புலவரைப் பார்த்து வாழ்க வளமுடன் என்று சொன்னேன். தமி பண்டிதருக்கு எரிச்சல் வந்து விட்டது. ‘வாழ்க வளமுடன்என்பது வியங்கோள். அது முன்னிலையில் தான் வரும். அதாவது, அவன் வாழ்க வளமுடன், இவன் வாழ்க வளமுடன் என்று தான் வரும். தன்மையில் நான் வாழ்க வளமுடன் என்று வராது. முன்னிலையிலும் நீ வாழ்க வளமுடன் என்று வராது. முன்னால் இருப்பவரைப் பார்த்து வாழ்க வளமுடன் என்று வியங்கோளில் வாழ்த்துவது மடத்தனம். என்னே தமிழர்களின் அறியாமை’ என்று என்னிடம் கடுமையாகப் பேசினார். நமது புலவர்க்கு அவர் குரு. எனவே புலவர் சொல்வதறியாது திகைத்தார்.

எனக்கும் துல்லியமான இலக்கண அறிவு இல்லாததனால், ‘பெரியவர்கள் விரும்பினால் இலக் கணத்தை மாற்றி, புது இலக்கியம் படைக்கலாம். எங்கள் மகரிஷிகள் போன்ற மகான்களை இலக்கண வரம்பிற்குள் அடக்க முடியாது’ என்றேன். அதற்குத் தமிழ் பண்டிதர், ‘மகான்களே ஆனாலும் இலக்கணத்திற்குக் கட்டுப்பட்டே ஆக வேண்டும்’ என்று கூறினார்.

எனது வழக்கப்படி, மேற்கோள் தேடுவதற்காக வள்ளலாரை எடுத்துப் படித்தேன். ஒரு பாடல் என் கவனத்திற்கு வந்தது. அது குணரத்தினம் என்னும் தனது நண்பருக்கு வள்ளலார் எழுதி அனுப்பிய வாழ்த்து மடல்.

அதில் ’வாழ்க! வளமுடன்!’ என தனது நண்பரைப் முன்னிலையில் வைத்து வள்ளலார் வாழ்த்தியிருந்தார். இது பற்றி மேற்சொன்ன நம் ஊர் தமிழாசிரியரிடம் நான் குறிப்பிட்ட போது அவர் நகைத்தார்.

‘கயவொடு ரவ்வொற்று ஈற்ற வியங்கோள்

இயலும் இடம், பால், எங்கும் என்ப’

• நன்னூல்.

என்னும் நன்னூல் சூத்திரத்தை குறிப்பிட்டு, ‘க’ விலும், ‘ய’ விலும், ‘ர்’ இலும் முடிகின்ற வியங்கோள்கள் தன்மை, முன்னிலை, படர்க்கை ஆகிய எல்லா இடங்களிலும், எல்லா பால்களிலும் பயன்படுத்தப்படும். அதாவது மூன்று இடங்களிலும் வியங்கோள்களை வித்தியாசமின்றிப் பயன்படுத்தலாம் என்பது தான் நன்னூலார் விதித்த இலக்கணம். அதன்படி ‘வாழ்க வளமுடன்!’ என்று முன்னிலையில் இருப்பவரைப் பார்த்து வாழ்த்துவது தவறில்லை என்று தமிழாசிரியர் விளக்கினார். அவருக்கு நன்றி. சரி. நான் கண்டெடுத்த வள்ளலாரின் வாழ்த்துப் பாடலின் ஒரு பெரிய புதையல் இருக்கிறது. அதைப் பிறகு பார்க்கலாம்.

(சென்ற இதழில் இதே தலைப்பில் வெளி வந்த கட்டுரையில் 12 ஆம் பக்கத்தில் 4 ஆவது பாராவில் ‘படர்க்கையில்’ என்றிருப்பது தவறு. ‘முன்னிலையில்’ எனத் திருத்திப் படித்துக் கொள்ள வேண்டுகிறோம்).

     வாழ்க வளமுடன் என வாழ்த்துவதில் இரண்டு விதமான இலக்கணப் பிழைகள் உள்ளன என்ற வாதத்திற்கு உரிய பதிலை 2002 ஜனவரி, மார்ச் இதழ்களிலும் வெளியிடப்பட்ட கட்டுரைகளில் படித்திருப்பீர்கள்.

வளத்துடன் வாழ்க என்று சொல்ல வேண்டியதில்லை என்பதற்கு மேற்கோள் தேடிய போது திருக்குறளிலேயே மேற்கோள்கள் கிடைத்த விவரம் அக்கட்டுரைகளில் உள்ளன. வியங்கோளை முன்னிலையிலும் ஒரு பாடலைக் கண்டெடுத்தாகச் சென்ற இதழில் குறிப்பிடப்பட்டு எழுதப்பட்டிருந்ததல்லவா? அந்தப் பாடல் வருமாறு:-

கல்வியிற் கேள்வியிற் கடலினுங் கடந்து, அன்பறி வொழுக்கம் அமைந்ததென்னிரண்டு

காண்போன் றென்பாற் கனிவுகொண்டமர்ந்த, குணரத் தினநீ குடும்பத் துடனே

தீர்க்க ஆயுளும் செல்வப் பெருக்கும், நோயற்ற வாழ்வும் நுவலரும் கீர்த்தியும்

சிவந்திகழ் ஞானமும் சித்தியும் பெற்று, வழ்க! வாழ்க! மகிழ்ந்தருட் டுணையால்

வாழ்க! வாழ்க! வளம் பெற வாழ்க!

     இறுக்கம் இரத்தின முதலியார்க்கு எழுதிய 20ஆவது திருமேகத்தின் (கடிதத்தின்) தலைப்பில் காணப்படுவது என்ற அடிக் குறிப்போடு இராமலிங்க பணி மன்றம் 2 ஆம் பதிப்பாக வெளியிட்டுள்ள திருவருட்பா ஆறாம் திருமுறை பக்கம் 1122 இல் மேற்படிப் பாடல் காணப்படுகிறது.

     நமது அருள் தந்தையின் முன்னர் உருவெளித்தோற்றமாகத் தோன்றி நான் உன்னுடன் ஒரு 10 வருடம் இருக்கிறேன்’ என்று வள்ளலார் கூறி மறைந்த விவர வாசகர்கள் அறிந்ததே. பல சொற்பொழிவுகளில் அச்செய்தியை மகரிஷிகள் குறிப்பிடுவார்கள். ‘எனது வாழ்க்கை விளக்கம்’ என்னும் மகரிஷிகளின் நூலிலும் அது உள்ளது.

நமக்காக நமது அருள் தந்தையவர்கள் உருவாக்கித் தருக்கின்ற ‘அருட்பேறாற்றல் கருணையினால் உடல் நலம், நீளாயுள், நிறை செல்வம், உயர்புகழ், மெய்ஞ்ஞானம் ஓங்கி வாழ்வேன்’ என்ற சங்கற்பத்தை மேற்கண்ட வள்ளலார் பாடலோடு ஒப்பு நோக்கிப் பாருங்கள்.

உடல் நலம் என்பது நோயற்ற வாழ்வு என்று வந்திருக்கிறது. நீளாயுள் என்பது தீர்க்க ஆயுளும் என்று வந்திருக்கிறது. தீர்க்க என்றால் முழுமையான எனப் பொருள்). நிறை செல்வம் என்பது செல்வப் பெருக்கு என வந்துள்ளது. உயர்புகழ் என்பது கீர்த்தி என வந்துள்ளது. (நுவலரும் என்றால் எடுத்துச் சொல்வதற்கு இயலாத எனப் பொருள்). மெய்ஞ்ஞானம் என்பது சிவந்திகழ் ஞானம் என வந்துள்ளது (சிவம் என்றாலும், மெய் என்றாலும் தெய்வம் ஆகும்).

இன்னொரு விஷயம் கவனியுங்கள். வளம் பெற வாழ்க என வள்ளலார் வாழ்த்தியிருக்கிறார். வாழ்க வளமுடன் என்ற வாழ்த்தும் வள்ளலார் தந்ததே என விளங்கும்.

மேற்போக்காகப் பார்க்கக் கூடியவர்கள் தவத்தின் நிறைவில் நாம் கூறி கொள்கின்றவரிடம் சங்கற்பக் கருத்துக்களை நமது மகரிஷிகள் வள்ளலாரைப் பார்த்துப் பிரதி செய்து கொண்டதாக, (காப்பியடித்து விட்டதாக), கூறக் கூடும். உண்மையென்னவென்றால், நமது ஆசானிடம் வந்து வள்ளலார் வாழ்ந்து கொண்டிருந்தார் என்பதற்கு இதைவிட வேறு ருஜு தேவையில்லை என்பதுதான். ஏனெனில், வள்ளலார் நூல்களை நமது மகரிஷிகள் படித்துப் பார்த்ததில்லை.

உலக சமாதானம் என்னும் நூலிலும் அதில் கூறப்பட்டுள்ள கருத்துக்களிலும் வள்ளலார் சொன்ன பத்தாண்டு காலத்தில் தான் எழுதப்பட்டுள்ளன. அதற்குப் பிறகும் மகரிஷிகளால் எழுதப்பட்ட கவிகளில் மெத்தப் படித்த வள்ளலார் சாயையே மிகுந்திருப்பதைக் காணலாம். நமது மகரிஷிகளோ தமிழை முறையாக ஓதியதில்லை. செய்யுங்களைத் திறம்பட எழுதுவதற்குப் படித்திருக்க வேண்டிய யாப்பிலக்கணம் நமது அருள் தந்தைக்குத் தெரியவே தெரியாது.

இதனால் தெரிவது என்ன? தான் கூறியவாறு 10 ஆண்டுகள் மட்டும் வள்ளலார் மகரிஷிகளிடம் வாழ்ந்து கொண்டிருக்கவில்லை எனத் தெரிகிறது. வேதாத்திரியை மிகவும் தனக்குத் தொடர்ந்தும் பிடித்துப் போகவே, வள்ளலார் அவர்கள் தொடர்ந்தும் மகரிஷிகளுடனேயே வாழ்ந்து கொண்டிருந்தார் என்றுதான் சொல்ல வேண்டும்.

நன்றி  - ஈரோடு மனவளக் கலைஞன் – பிப்ரவரி 2003

ஏழாம் சுவை - நகைச்சுவை - 3

ஏழாம் சுவை - நகைச்சுவை

                                        - அறு(சு)வையானந்தா

" ஜி , உங்கள் ஏழாம் சுவையை ருசித்துப் படித்த நிறைய பேர் உங்களை தரிசிக்க வேண்டும் என கேட்டிருக்கின்றார்கள் " என்றதும்

" நிச்சயமாகப் பார்க்கலாம். அதுவும் அருட்குரலுக்கு குறைந்தது 25 சந்தா தாரர்கள்  சேர்ப்பவர்களை  நானே சென்று பார்ப்பேன் "  என்ற ஜி

" சிரிப்பு,

இதன் சிறப்பை சீர்தூக்கிப் பார்ப்பதே
நமது பொறுப்பு
துன்ப வாழ்விலும் இன்பம் காணும்
விந்தை புரிவது சிரிப்பு - இதைத்
துணையாய்க் கொள்ளும் மக்கள் மனதில்
துலங்கிடும் தனி செழிப்பு " 

என்ற கலைவாணரின் பாடலைப் பாட ஆரம்பித்துவிட்டார். பிறகு 
" எந்த சப்ஜெக்ட்லியும் ஜோக் சொல்லலாம். மாமியார்-மருமகள் ஜோக்குகள் நிறைய கேட்டிருப்பீர்கள். இதுல புதுமையா ரெண்டு சொல்றேன் -

உலகிலேயே மிகவும் அதிர்ஷ்டக்கார பெண்மணி யார் தெரியுமா ?

என ஜி கேட்க, நாங்கள் விழிக்க 

ஏவாள்! எப்படி தெரியுமா?
அவளுக்குத்தான்   மாமியாரே  கிடையாதே..! "  
என ஜி சொல்ல ஒரே சிரிப்பலைகள்.

" இராமாயணத்திலே ராமன் காட்டுக்குப் போனப்ப சீதையும் உடன்சென்றாள். ஏன் தெரியுமா ? " 

என ஜி கேட்க " நீங்களே சொல்லுங்கள் " என நாம் சொல்ல 

" தசரதனுக்கு பட்டத்து ராணிகள் மூணு பேரு. இது தவிர அறுபதாயிரம்மனைவிகள். ஒரு மாமியாரையே தாக்கு பிடிக்க முடியாது..இதுல 

60003  பேரா...

காடுதான் பெட்டர்ன்னு  சீதை  முடிவு பண்ணிட்டா!" 

என ஜி முடிக்க எல்லோரும் விழுந்து, விழுந்து சிரிக்கின்றார்கள்.

" கொஞ்சம் யோசிச்சுப் பாருங்க.. தசரதன் தன் 60003 மனைவியர்களுடன் 
நகர்வலம் போனால் எப்படி இருக்கும்? மகளிர் பேரணிக்கு தலைமை வகித்து நடத்தி செல்வது போல் அல்லவா இருக்கும்!" 

என மேலும்  கலகலப்பு மூட்டுகின்றார் ஜி.

" இராமாயணத்திலிருந்து வேறு ஏதேனும் ஜோக் சொல்ல முடியுமா?"
 என நாம் கேட்க 

" இராமாயணத்தில் ஒரு முக்கியமான உணர்ச்சிகரமான கட்டம்.....இராவணனைக் கொன்றுவிட்டு இராமர் அசோகவனத்தில் இருக்கும் சீதையைக் காண வருகின்றார். இராவணன் தூக்கிச் சென்று பிறகு வெகுநாள் கழித்து  இருவரும் சந்திக்கின்றனர். சீதை இராமரிடம் முதலில் என்ன பேசியிருப்பாள்?"

என ஜி கேட்க 

" நல்லாயிருக்கீங்களா? எனக் கேட்டு இராமர் காலில் விழுந்து வணங்குவாள் " என நாம் சொல்ல 

" இதுல எங்க ஜோக் வருது? கொஞ்சம் இந்த காலத்து பெண்கள் மனோநிலையில் யோசித்துத்தான் சொல்லுங்களேன்" என்கிறார் ஜி.

நமக்கு ஒன்றும் தோன்றவில்லை. ஜி யைப் பார்க்க அவர் சொல்கிறார் -

" மானைப் பிடிக்கச் சென்றீர்களே! பத்திரமாக பிடித்து வைத்திருக்கின்றீர்கள் அல்லவா? - என்றுதானே கேட்டிருப்பாள்  "

சிரித்து, சிரித்து நமக்கு வயிற்று வலியே வந்து விடுகின்றது.

ஏழாம் சுவை - நகைச்சுவை - 2

ஏழாம் சுவை - நகைச்சுவை

  - அறு(சு)வையானந்தா

நண்பர் ஒருவரின் தென்னந்தோப்பில் சுவாமி 
அறு (சு)வையானந்தாஜியின் கலந்துரையாடல் ஏற்பாடு செய்யப்பட்டிருந்தது.  'ஜி'  ( சுவாமிஜியை ஜி என இனி   அழைக்கலாம்) ஒரு சிறிய காரில் வந்திறங்கினார்.
காரில் இடப் பற்றாக்குறை காரணமாக நசுக்கப்பட்டு வந்த  அவரிடம் மன்னிப்பு கேட்டோம். அவரோ " காரில் வந்தவர்களுடன் மிக நெருக்கமாக பழக வாய்ப்பு கொடுத்தீர்களே,  அதற்கு மிக்க  நன்றி!" என சொல்லி நிகழ்ச்சியை கலகலப்புடன் ஆரம்பித்தார்.

" வாய் விட்டு சிரித்தா நோய் விட்டுப் போகும், கவலைகள் மறந்துடும் என்பதற்காக பல ஊர்ல சிரிப்பு க்ளப் ( ஹ்யூமர்  கிளப் ) ஆரம்பிச்சிருக்காங்க..சிரிப்பு யோகான்னும் சில பயிற்சிகள் தராங்க..நானும் உங்களைச் சிரிக்க வைக்க  பல விஷயங்களப் பத்திப் பேசப் போறேன். ஆயிரம் தத்துவங்களை விட ஒரு சிரிப்பு உயர்ந்ததுன்னு சொல்லுவாங்க..! முதல்ல ஒரு விஷயம்... நகைச்சுவை என்பது யார் மனதையும் புண்படுத்தக் கூடாது. மனம் விட்டு வாய்விட்டு சிரிக்கும்படியாக அமைய வேண்டும்.  . JOKES CAN NEITHER BE CREATED NOR DESTROYED. Jokes  can take different forms. ஏற்கனவே இந்த ஜோக்கை நான் கேட்டிருக்கேனே எனத் தோணலாம். புதிய சூழ்நிலையில் கேட்கும்போது அங்கு சிரிப்புதான் முக்கியம். எனவே சிரிக்க இங்கு வந்துள்ளோம். நன்றாக சிரியுங்கள்.

பல வகைகளில் உங்களை சிரிக்க வைக்க முடியும்.  வார்த்தை பிரயோகங்களில், சிலேடையாகப் பேசுவதில் என மக்களை சிரிக்க வைத்தவர்கள் காளமேக புலவர், வாரியார் சுவாமிகள், கி.வா.ஜ அவர்கள் என பலர் இருக்கின்றனர். அவர்கள் பாணியில் உதாரணமாக " தேங்காய் இளசாய் இருந்தா அது  வழுக்கை. ஆனா மனுஷனுக்கு வயசானா வருவது வழுக்கை " அப்படின்னா சொன்னா சிரிப்பு வருகிறது அல்லவா.  இந்த வழுக்கையை இன்னும் வேடிக்கையாக " கடவுளுக்கு அடிச்சா மொட்டை.. கடவுளே எடுத்துக்கிட்டா அது சொட்டை" என பஞ்ச் டயலாக் சொல்லலாம்."

வந்திருந்தவர்கள் சிரித்து மகிழ்கின்றனர். ஒருவர் " ஜி, புதுமாதிரியான சிலேடை ஒன்று சொல்லுங்களேன்" என  கேட்கிறார்.

" ஒ! சிலேடைக்கடி ஒன்று சொல்கிறேன். ஒரு மனவளக்கலை அன்பர் என்னிடம் வந்து ' எனக்கு தவம் நன்கு சித்தியாகிவிட்டது என்று எப்படி தெரிந்து கொள்வது' எனக் கேட்டார். .நான்  ' உங்கள் வீட்டிற்கு பாம்புகள் நிறைய வரு கின்றனவா' எனக் கேட்டேன். அவர் பயந்துவிட்டார். நான் சொன்னேன் - " நீங்கள் நன்கு தவம் செய்பவராய் இருந்தால் உங்கள் முகத்தில் தவக்களை தெரியுமல்லவா... அதைப் பிடிக்கத்தான் பாம்புகள் வரும்!

தவ களை  - தவக்களை  இதுதான் சிலேடைக்கடி." 

- தொடரும்