ஆன்மீக ஆனா, ஆவன்னா - 25

யோகமும் இளைஞர் வல்லமையும் 

( YOGA  FOR  YOUTH  EMPOWERMENT )

" .அம்மா...எங்களுக்கு மிகவும் பயனுள்ள ஆன்மீக அடிப்படை விஷயங்களை மிகவும் எளிதாக விளக்கினீர்கள்!  இங்குள்ள அனைத்து மாணவிகளின் சார்பில் நன்றியினைத் தெரிவிக்கின்றேன். இன்றைய சூழ்நிலையில் எங்களுக்கு உள்ள பயத்தினையும், மன அழுத்தத்தினையும், கவலைகளையும் போக்க வழி காட்டி உதவ வேண்டும் " என்கிறாள் .ஒரு மாணவி. 

"  என் இனிய  மாணவச் செல்வங்களே! உங்களைப்  பயமுறுத்தும், மன அழுத்தம் கொடுக்கும் பிரச்சனைகளைச் சொல்லுங்கள்" என்கிறார்கள் அம்மா.

மாணவிகள் பிரச்சனைகளைக் -கொட்டுகிறார்கள் -

* பாடங்கள் புரியாமல்  மனப்பாடம் செய்தே பரீட்சை எழுதுகின்றோம். அப்படி மனப்பாடம் செய்தது சீக்கிரமே மறந்து விடுகிறது.

* அப்படியே பாடங்களைப்  புரிந்து படித்து நிறைய மதிப்பெண்கள் வாங்கினாலும் நாங்கள் விரும்பும் கல்வி/கல்லூரி கிடைப்பதில்லை. எதிர்காலத்தில் நல்ல வேலை கிடைக்குமா என்ற பயம் இப்போதே இருக்கின்றது.

* நேரத்தை வீணடிக்கின்றோம் என்று   தெரிந்தே  டிவி, இன்டர்நெட், பேஸ்புக், செல்போன் என அவைகளில் ஆர்வம் கொண்டுள்ளோம்.

* எங்களின் பருவ  வயதில் ஏற்படும்  புது,புது உணர்வுகள் - அவைகளைத் தூண்டிவிடும் சினிமா, டிவி, பாடல்கள் இவற்றில் ஈடுபாடு 

* பெற்றோர்கள் இருவரும் வேலைக்கு செல்வதால் அவர்கள்  எங்களுக்கு போதிய நேரம் ஒதுக்குவதில்ல 

* பெற்றோர்களிடையே  அடிக்கடி சண்டை

* சக மாணவர்களின் வேண்டாத பழக்கங்கள் 

* தன் தோற்றம் பற்றிய தாழ்வு மனப்பான்மை 

* இப்பருவத்தில் தோன்றும் காதல் உணர்வுகள் - இதனால் ஏற்படும் தோல்விகள், பிரச்சனைகள் 

* மாணவிகளுக்கு ஏற்படும் பாலியல் தொந்தரவுகள் 

* பெற்றோர்கள், ஆசிரியர்களின் அதிகமான கண்டிப்பு 

* எல்லா வசதிகளையும்/இன்பங்களையும் அனுபவிக்கத் துடிக்கும் சபல புத்தி

* பெற்றோர்கள் தரும் அதிக அளவு சுதந்திரம்/பாக்கெட் மணி 

" மாணவர்களைக் கேட்டால் இன்னும் அதிகமாகச் சொல்வார்கள். ..இத்தனைப் பிரச்சனைகள் நிச்சயமாக உங்களுக்கு மன அழுத்தம் கொடுத்து   கொண்டிருக்கும்  என்பதில் சந்தேகமே இல்லை!  இந்த இளவயது பருவத்தினை ' கையாளுவதற்குக் கடினமான  காலம் ' என பைபிளில் ஒரு வாசகம் உள்ளது. எங்கள் காலத்தில் நாங்கள்  வீடு, பள்ளி, படிப்பு  என்று இருந்ததால் நீங்கள் சொன்ன முக்கால்வாசி பிரச்சனைகள் இல்லாமல் தப்பித்துவிட்டோம். நீங்கள் படும் கஷ்டங்களுக்கு கடந்த ஐம்பது ஆண்டு சமுதாய மாற்றங்களே காரணம். பெற்றோர்கள், ஆசிரியர்கள், கல்வி முறை, அரசாங்கம் என பலர்மேல் .பழி சொல்லலாம். ஆனால் இந்த தீங்கான சூழ்நிலையை மாற்றித்தான் ஆகவேண்டும். இந்த நாட்டின் ஏற்றமிகு எதிர்காலம் உங்கள் கையில்தான் உள்ளது. எனவே பொறுப்புகளும் உங்களுக்கே அதிகமாக உள்ளது.

இதை நன்கு உணர்ந்த உலக சமுதாய  சங்கம் அருள்தந்தை அவர்கள் கூறியபடி இளைஞர்களிடையே நல்ல ஒழுக்க பண்புகளையும், நல்ல நடத்தையையும் மேம்படுத்த " யோகமும் இளைஞர் வல்லமையும் " என்ற தலைப்பிலே சான்றிதழ் மற்றும் பட்டய கல்வித் திட்டம்  வந்துள்ளது.
இதில் நீங்கள் சொன்ன அத்துனைப் பிரச்சனைகளையும் வெற்றிகொள்ள பாடதிட்டம் அமைக்கப்பட்டுள்ளது. பத்தாவது முடித்தவர்கள் இதில் பட்டய கல்வி பெறலாம். மனவளக்கலை பயிற்சிகள் தவிர மேலும் இன்றைய மாணவர்களுக்குத் தேவையான நினைவாற்றல் திறனைப் பெருக்கும் பயிற்சிகள், பாடங்களைப் புரிந்து படித்து தேர்வு எழுதுவது எப்படி, தன்னம்பிக்கையைப் பெருக்க, தோல்வி மனப்பான்மையைப் போக்க, உணர்ச்சி மேலாண்மை, டிவி,நெட், செல், பேஸ்புக் போன்றவைகளை எப்படி உபயோகமாக கையாள்வது, நேர மேலாண்மை என  தரப்படவுள்ளது.
இக்கல்வியில் நீங்கள் அனைவரும் சேர்ந்து இப்பயிற்சிகளைப் பெற்று வெற்றியாளர்களாக திகழ வாழ்த்துக்கள்!

" யோகமும் இளைஞர் வல்லமையும் "  கல்வி பற்றி உங்களுக்கு அருகாமையில் உள்ள மனவளக்கலை மன்றங்களில் தெரிந்துகொண்டு  உங்கள் நண்பர்களுக்கும் சொல்லுங்கள்.

நீங்கள் அனைவரும் உயர் ஒழுக்கம், உயர்கல்வி பெற்று வாழ்வின் எல்லா வளங்களையும் நிறைவாகப் பெற்று நீடூழி வாழ வாழ்த்துகின்றேன். இறையருளும், குருவருளும் உங்களை வழி நடத்துமாக!

வாழ்க வளமுடன்!

தொடர் நிறைவு பெறுகின்றது 

ஆன்மீக ஆனா, ஆவன்னா - 24

 
" அம்மா, பழனி தல வரலாறு சொல்லும் உண்மையை புரிந்து கொண்டோம். மிக்க நன்றி. இது போல மற்ற கோவில்களின் தல வரலாறுகள் உணர்த்தும் விஞ்ஞான விளக்கங்களைத் தெரிந்து கொள்ள ஆவலாய் இருக்கின்றோம்.
 நிறைய சொல்லுங்கள் " எனக் கேட்கிறாள் ஒரு மாணவி.

" என் இனிய மாணவச் செல்வங்களே! இதுவரை ஆன்மீக ஆனா, ஆவன்னா என்ற தலைப்பில் அடிப்படை விஷயங்கள் அனைத்தையுமே நன்கு தெளிவாக உணர்ந்துகொண்டீர்கள்.  ஒவ்வொரு கோயிலாக எடுத்துக்கொண்டு அந்த கோயில் புராணம் மற்றும் பெருமைகளை நன்கு ஆராய்ந்து பாருங்கள். நீங்களே புராணங்கள் விளக்கும் தத்துவங்களைப் புரிந்து கொள்வீரகள்" என்கிறார்கள் அம்மா.

" அம்மா, நீங்களே ஒரு ஊர் கதையை சொல்லுங்கள். நாங்கள் உண்மைத் தத்துவத்தைக் கண்டு பிடிக்கின்றோம் " எனக் கேட்கிறாள் ஒரு மாணவி.

" சரி, மதுரையில் சிவபெருமான் பிட்டுக்கு மண் சுமந்ததாக ஒரு திருவிளையாடல் கதை உங்கள் எல்லோருக்கும் தெரியும் அல்லவா! அதைச் சொல்லி அந்த கதை மூலம் நீங்கள் அறியும் உண்மையையும் சொல்லுங்கள் பார்க்கலாம்" என்கிறார்கள் அம்மா.

ஒரு மாணவி சொல்ல ஆரம்பிக்கின்றாள் -

சிவனின் லீலையால்  வைகையில் வெள்ளம் வந்து கரை உடைந்துவிடுகின்றது.

கரையை சீர் செய்ய வீட்டிற்கு ஒரு இளைஞன் வரவேண்டும் என அரசன் ஆணையிடுகின்றான்.

வந்தி எனும் புட்டு சுட்டு விற்கும் கிழவி தன சார்பாக அனுப்ப ஆள் இல்லாததால் இறைவனை வேண்ட சிவபெருமான் ஓர் இளைஞன் உருவில் அவளிடம் வந்து ' நான் உனக்காக வேலை செய்கின்றேன். எனக்கு கூலியாக உன் புட்டை கொடு' என  கேட்கிறார்.

ஆனால் கிழவியோ ' நான் புட்டு செய்யும்போது உதிரும் புட்டு மாத்திரமே உனக்கு கொடுக்கமுடியும்' என்கிறாள்.

அன்று வந்திகிழவி செய்யும் புட்டு எல்லாமே உதிர்ந்துவிடுகின்றது.
எல்லா புட்டினையும் வயிறு முட்ட சாப்பிட்ட சிவபெருமான் வைகை கரையை அடைக்காமல் ஒரு மரத்தடியில் தூங்குகிறார். 

இதைக் கண்ட அரசன் கோபமுற்று கூலியாளாக வந்த சிவனை பிரம்பால் அடிக்க அந்த அடி பிரபஞ்சத்தில் உள்ள அணைத்து உயிர்களின்மீது பட அரசன் அரண்டுபோய் விட்டான்...."

" இந்த  அளவு கதை போதும். இதிலிருந்து நீங்கள் உணரும் தத்துவம் என்ன?" எனக் கேட்கிறார்கள் அம்மா.

" இறைநிலையாக உள்ள சுத்தவெளி இந்த பிரபஞ்சம் முழுதும்  மற்றும் பிரபஞ்சத்தை சூழ்ந்தும் உள்ளது. சுத்தவெளியின்  எந்த ஒரு பகுதியில் ஏற்படும் அதிர்வுகளோ, மாற்றங்களோ அல்லது விளைவுகளோ சுத்தவெளியின் எல்லா இடங்களிலும் உணரப்படும் " என்கிறாள் ஒரு மாணவி.

" அற்புதமாகச் சொன்னாய். சுத்தவெளியை நம் முன்னோர்கள் சிவம் என்ற பெயரில் அழைத்தார்கள். பிறகு மக்களுக்குப் புரிய வைப்பதற்காக அதற்கு சிவன் என்ற உருவம் கொடுத்து பல விஞ்ஞானத் தத்துவங்களை மக்களுக்கு புரிய வைப்பதற்காக இந்த மாதிரி புராணக் கதைகளைச்  சொன்னார்கள். ஆனால் இன்றோ மக்கள் இம்மாதிரி கதைகளில் உள்ள தத்துவத்தை உணராமல் கதையின் சடங்குகளுக்கு முக்கியம் கொடுக்கின்றார்கள். உதாரணமாக பிட்டுக்கு மண் சுமந்த இந்த திருவிளையாடல் ஒவ்வொரு ஆண்டும் ஆவணி மாதம் மதுரையில் பண்டிகையாக கொண்டாடப் படுகின்றது. அன்று சிவனுக்கு புட்டு படைத்து வழிபடும் சடங்கு மாத்திரம்தான் நடைபெறுகின்றது. ஆனால் சிவம் எல்லா உயிர்களிலும் இருக்கின்றது  என்ற  இக்கதையின் தத்துவத்தை புரிந்து கொள்பவர்கள் மிகச் சிலரே" என்கிறார்கள் அம்மா.

" ஆன்மீக அடிப்படைகளை தெளிவாக எங்களுக்கு உணர்த்திவிட்டீர்கள். நாங்கள் இப்போது நன்றாக சிந்தித்து தெளிவாக முடிவேடுக்கின்றோம்.
எங்களுக்கு நீங்கள் மேலும் என்ன சொல்ல விரும்புகின்றீர்கள்?"  என ஒரு மாணவி கேட்க 

" என் இனிய மாணவச் செல்வங்களே!  நீங்கள் சிந்தனையில் உயர்ந்துள்ளதைக் கண்டு மிகவும் மகிழ்கின்றேன். என்னுடன் ஒத்துழைத்ததற்கு மிக்க நன்றி. நீங்கள் தெரிந்துகொண்ட இந்த ஆன்மீக அடிப்படை எல்லா மக்களுக்கும் போய் சேரவேண்டும். குறிப்பாக மாணவர்களுக்கு தெளிவாக தெரியவேண்டும். இன்று இந்தியாவின் மக்கள் தொகையில் பாதி பேர்கள், சுமார் 60 கோடி மக்கள் 30 வயதுக்கு கீழே உள்ள இளைஞர்கள். இவர்கள்தான் எதிர்கால இந்தியாவை வல்லமையாக உருவாக்க வேண்டும். ஆனால் இவர்களின் இன்றைய மனோநிலை சரியான வழிகாட்டுதல் இன்றி இவர்கள் செல்லும் பாதை மிகவும் மோசமாக உள்ளது. இவர்களுக்கு நல்லமுறையில் வழிகாட்டி, ஆக்கத்துறையில் ஈடுபடுத்தி ஊக்கமுடன் உழைத்து உயர என்ன செய்யலாம்?" என அம்மா கேட்கின்றார்கள்.

மாணவிகள் சிந்திக்கின்றனர்.

அடுத்த இதழுடன் இந்த தொடர் நிறைவு பெறுகின்றது.

ஆன்மீக ஆனா, ஆவன்னா - 23

 ஞானப்பழம் 

" அம்மா, நம் தமிழ்நாட்டில்  ஏகப்பட்ட கோவில்கள், குளங்கள் உள்ளனவே! அங்கு சென்று வழிபட்டால் புண்ணியம் என்கிறார்கள்.  இது  பற்றி விளக்குங்களேன் " என ஒரு  கேட்கின்றாள்.


" நல்ல கேள்வி! இந்த விஷயம் பற்றி  அனைவரும் தெளிவாகத் தெரிந்து கொள்ள வேண்டும். ஒவ்வொரு கோவில் பற்றியும் அங்கு உள்ள குளம் பற்றியும் தல வரலாறு இருக்கும் அல்லவா... அதைக் கொஞ்சம் கூர்ந்து ஆராய்ந்தால் நம் முன்னோர்களின் அறிவாற்றல் வெளிப்படும். உதாரணமாக நாம் ஒரு கோவில் தலப் புராணம் ஒன்றை ஆராய்வோம். உங்கள் அனைவருக்கும் தெரிந்த கோவில் ஒன்று சொல்லுங்கள் " என அம்மா கேட்க,

" மதுரை, பழனி, திருப்பதி .." என பல கோவில்கள் பெயர்களை மாணவிகள் சொல்கின்றனர்.

" நாம் பழனி கோவில் தல வரலாறு பற்றி பார்க்கலாம். யாராவது அதை சுருக்கமாகச் சொல்லுங்கள்" என அம்மா கேட்க 

" மாம்பழம் ஒன்றுக்காக விநாயகரும், முருகனும் சண்டை போட்டுக்கொள்ள சிவனும், பார்வதியும் அவர்களுக்கு ஒரு போட்டி வைக்கின்றார்கள். யார் முதலில் இந்த அகிலத்தை சுற்றி வருகிறார்களோ  அவர்களுக்கே மாம்பழம் எனச் சொல்ல, முருகன் உடனே மயில் மீதேறி சுற்றத் தொடங்கிவிட்டார். விநாயகரோ தன்  பெருத்த உடலை வைத்துக் கொண்டு எப்படி சுற்றுவது என யோசித்து ' அம்மை அப்பனே அகிலம் ' என்று சிவனையும், பார்வதியையும் சுற்றிவந்து மாம்பழத்தைப் பெற்றுக் கொண்டார். இதைக் கண்ட முருகன் கோபித்துக் கொண்டு ஆண்டி கோலம் பூண்டு  ஏறி நின்ற மலைதான் பழனி" என்கிறாள் ஒரு மாணவி.

" சரியாகச் சொன்னாய்.. இந்த கதையிலிருந்து நீங்கள் அறிந்து கொண்ட நீதி என்ன?" எனக் கேட்கிறார்கள் அம்மா. 

" அம்மா-அப்பாதான் எல்லாம்" என்கிறாள் ஒரு மாணவி.

" முருகனுக்கே கோபம் வரும்போது நமக்கும் கோபம் வருவதில் தப்பில்லை" என்கிறாள் ஒரு மாணவி.

அனைவரும் சிரிக்கின்றார்கள்.

" ஒரு திரைப்படம் பார்த்துவிட்டு படத்தில் லாஜிக்கே இல்லை..சொதப்பல்! என விமர்சனம் செய்கின்றோம். பழனி கதையில் எவ்வளவு ஓட்டை இருக்கின்றது எனப் பார்க்கலாமா...

1. எல்லாம் அறிந்த ஞானபண்டிதனான முருகனுக்கு தன்  அண்ணன் அம்மா-அப்பாவை சுற்றிவந்து பழத்தை வாங்கிக்கொள்வார் என தெரியாமலா இருக்கும்?
2. விநாயகர் எல்லாம் வல்லவர். அவரை வணங்காமல் போருக்கு புறப்பட்ட சிவனுடைய தேரின் அச்சு முறிந்ததாம். அப்படிப்பட்ட  விநாயகர் ஆற்றல் குறைந்தவரா?
3. தம்பிக்காக அண்ணன் விட்டுக் கொடுக்கலாம் அல்லவா!
4. தம்பிதான் நாம் இருவரும் பழத்தை பங்கு போட்டுக்கொள்ளலாம் என சொல்லி இருக்கலாமே!
5. சிவன்தான் இன்னொரு பழத்தை படைத்து கொடுத்திருக்கலாமே!

இப்படி இன்னும் யோசிக்கலாம். உண்மையான தத்துவம் என்ன தெரியுமா...

நம் முன்னோர்கள் சுத்தவெளியான இறைநிலை எங்கும் நிறைந்துள்ளது என்பதை மக்களுக்குத்  தெரிவிக்க மிகவும் கஷ்டப்பட்டார்கள். இன்றிருக்கும் விஞ்ஞான வசதிகள் அவர்களுக்கு இல்லை.  நீங்கள் எளிதாக உணர்ந்துகொண்டீர்கள். சொல்லுங்கள் பார்க்கலாம்.. சுத்தவெளி அல்லது இறைநிலை அல்லது சிவம் எங்குள்ளது?" என அம்மா கேட்க 

" சுத்தவெளி  எனும் சிவம் அணுவின் மையத்திலும், அணுக்களிடையேயும், பிரபஞ்சத்துக்குள்ளும், பிரபஞ்சத்தை சூழ்ந்தும் உள்ளது" என்கிறார்கள் மாணவிகள்.

"  நன்றாகப் புரிந்துகொண்டுள்ளீர்கள்.. பாராட்டுக்கள்! நீங்கள் இப்போது சொன்னதைத்தான் பழனி கதை . விளக்குகின்றது. விநாயகர் அணுவில் சிவம்-சக்தி  இருப்பதை உணர்ந்து சுற்றிவந்ததாகவும், முருகன் அகிலத்தை சூழ்ந்து இருக்கும் சுத்தவெளியாகிய சிவத்தை சுற்றி வந்ததாகவும் எடுத்துக் கொள்ளலாம் அல்லவா! முன்னோர்களுக்கு விஞ்ஞான சாதனங்கள் ஏதும் இல்லாத காரணத்தினால் இந்த தத்துவத்தை ஒரு கதையாகச் சொன்னார்கள்.
கதை சுவையாக இருப்பதற்கு விநாயகருக்கும், முருகனுக்கும் சண்டை வந்தது...முருகன் கோபித்திக்கொண்டான்,,என கொஞ்சம் மசாலா சேர்த்தார்கள். ஆனால் இன்று தத்துவத்தை மறந்து பழனி என்றாலே பஞ்சாமிர்தம் ஞாபகம்தான் வருகின்றது.." என முடிக்கின்றார்கள் அம்மா.

மாணவிகள் சிரிக்கின்றனர். 

" நீங்கள் சொன்னதுதான் சரி என எப்படி எடுத்துக்கொள்வது?" என ஒரு மாணவி கேட்கின்றாள்.

" இந்த விளக்கத்தை சொன்னவர் நானல்ல..புகழ்பெற்ற திருமுருக கிருபானந்த வாரியார் சுவாமிகள் அவர்கள்" என்கிறார்கள் அம்மா.

- தொடரும்

ஆன்மீக ஆனா, ஆவன்னா - 22

பெண்ணின் பெருமை

"அம்மா! பெண்கள் பற்றி பெரும்பாலும் மதநூல்களில் இழிவாய் சொல்லியிருக்கின்றார்களே, கேட்கும்போது மிகவும் வருத்தமாக உள்ளது. ஏன் இப்படி எழுதியுள்ளார்கள்?" என  ஒரு மாணவி கேட்க 

அம்மா சொல்கின்றார்கள் -

" இதற்கான விடை ரொம்ப சிம்பிள். மதநூல்களையும், பெண்கள் இப்படிதான் நடக்கவேண்டும் என்பதை எழுதியவர்கள் ஆண்கள்தான்! பெண்கள் அடிமைகள் என்ற உணர்வு  அந்த காலத்திலிருந்தே ஆண்களுக்கு இருந்து கொண்டிருக்கின்றது.   மாணவிகளாகிய நீங்கள் பெண்களின் பெருமை பற்றி நிறைய தெரிந்து கொள்ளவேண்டும்.  

பாரதியார் பெண்ணின் அடிமைதனத்தை இப்படி இடித்துரைகின்றார் -

பெண்ணுக்கு ஞானத்தை வைத்தான்-புவி

பேணிவளர்த்திடும் ஈசன

மண்ணுக்குள்ளே சில மூடர் - நல்ல

மாதரறிவைக் கெடுத்தார்

கண்கள் இரண்டினில் ஒன்றைக் - குத்திக்

காட்சி கெடுத்திடலாமோ?

பெண்கள் அறிவை வளர்த்தால் - வையகம்

பேதமை யற்றிடுங் காணீர்    - 

பெண்கள் மனிதருக்குள் ஆணுக்கும் பெண்ணுக்கும் எத்தகைய வித்தியாசமில்லை என்பதும், ஆண்கள் அடைய விரும்பும் சீர்திருத்தங்கள் போலவே பெண்களுக்கும் அளிக்க வேண்டும் என்பதும், ஏனெனில், அவர்களை அழுத்தி அடிமைப்படுத்திய கொடுமையான பலமானது பெண்கள் தாங்கள் மெல்லியலாளர்கள் என்றும், ஏதாவது ஒரு ஆணின் காப்பில் இருக்கவேண்டியவர்களென்றும், தங்களையே கருதிக்கொள்ளும்படி செய்துவிட்டது. ஆதலால் அது முதலில் மாறவேண்டியது அவசியமாகின்றது.

நம் மகரிஷி அவர்கள் பெண்ணின் பெருமை பற்றி பேசியதில்  சுருக்கமாக அவர் வார்த்தைகளில் சொல்கின்றேன் - 

ஆணகளுக்கும், பெண்களுக்கும் உள்ள வித்தியாசம் இது தான். கணவன் அலுவலகத்திற்கோ தொழிற்சாலைக்கோ போகும் போது கூட மனைவியானவள் "அவரை நல்லபடியாகக் காப்பாற்று," என்று ஏதேனும் ஒரு தெய்வத்தை வேண்டிக் கொள்வதைப் பார்த்திருக்கிறோம். சமுதாயத்தில் ஒரு பழக்கமாகவே இது வந்து விட்டது. ஆனால் ஆண்களோ நல்லதாக இருந்தாலும் பெண்ணை பாராட்டுவதற்கு ஒரு கஞ்சத்தனம்! பெரிய பெரிய நன்மைகளை எல்லாம் தொடர்ந்து பெற்றவர்கள் கூட என்ன எண்ணத்தில் இருக்கிறார்கள்? ஒரு சிறிய பாராட்டு வாய் திறந்து சொன்னால் அவள் கை ஓங்கி விடுமாம்!  தானாக தன்னுடைய மனைவியைப் பாராட்டி அதிலே இருந்து அந்த இன்பத்தை அடையக் கூடிய மறுக்கக் கூடிய உள்ளங்களுக்கு அன்பு என்பது எங்கே உண்டாகும்? இதற்கு அடிப்படைக் காரணம் என்ன என்றால் நீண்ட காலமாகப் பழக்கத்தில் பெண்களை சாதாரணமாக உபயோகப்படக் கூடிய பொருளாகவே மதித்து மதித்து, அதே மாதிரி நிலையிலே பல நூல்கள் வந்ததனால் அந்தக் கருத்து இன்றும் நிலவி வருகிறது. பெண்களுக்குச் சம உரிமை மாத்திரம் இல்லை, பெரிய மதிப்பும் உண்டு என்பதை உணர்ந்து கொள்ள வேண்டும். அது தான் எனது கவிதை நூலிலே ஒரு கவியிலே எழுதி இருக்கிறேன்:

"பெண் வயிற்றி லுருவாகிப்

பெண் பாலுண்டே வளர்ந்தாய்

பெண் துணையால் வாழ்கின்றாய்

பெண்ணின் பெருமை உணர்,"

என்று, தாய்க்குலத்திற்கு நாம் ஏன் அவ்வளவு மதிப்புத்தர வேண்டியதாக இருக்கிறது என்று உலக சமாதானம் என்ற நூலில் ஒரு இடத்தில் விளக்கம் கொடுக்கும் போது,

"பெண்ணினத்தின் பெருமதிப்பை உணர்ந்தே உள்ளேன்

பேருலகில் வாழுகின்ற மக்கள் எல்லாம்

பெண்ணினத்தின் அன்பளிப்பே எனில் வேறென்ன

பெருமை இதை விட எடுத்துச் சொல்லுதற்கு?

பெண்ணினத்தின் இயல்பு பெற்ற மக்கள் தம்மை,

பிறர் வளர்க்க அனுமதியார், மனமும் ஒவ்வார்,

பெண்ணினத்தின் விடுதலைக்கு இந்தத் தியாகம்,

பேருலக அமைதிக்கும் அவசியம் ஆம்,"

என்று எழுதியுள்ளேன்.  வேறு என்ன பெருமை இதைவிட எடுத்துக் கூறுவதற்கு? வேறு ஒரு பெருமையும் நீங்கள் பேச வேண்டியதில்லை; எல்லாருமே பெண்களால் அளிக்கப்பட்ட, பெறப்பட்ட பிள்ளைகள்தான் என்பதை உணர்ந்தாலே போதும்.  சம உரிமை மாத்திரம் அல்ல, இன்னும் பிரத்தியட்சமாக சில உரிமைகள்கூட அவர்களுக்குக் கொடுத்து நாம் வாழ வைக்க வேண்டும் என்பதை ஒவ்வொருவரும் உணர வேண்டும். போன காலம் எல்லாம் போகட்டும், இனி வருங்காலத்திலேயாயினும் முதலில் அவரவர்கள் வீட்டிலே தொடங்க வேண்டும்.

கருத்தரித்த நாள் முதற்கொண்டு ஒன்பது மாதம் பத்து நாள் வரையில் ஒரு தாய்க்கு என்ன துன்பம் இருக்கும் என்று யாராலும் எண்ணிப் பார்த்ததால் அதை விடத் துன்பம் உலகத்தில் மனிதனுக்கு இருக்க முடியாது.

எல்லையற்ற பெருவெளியாகி மெய்ப்பொருள் தன்னில் உள்ளமைந்துள்ள ஆற்றலால் நுண்ணியக்க மூலக்கூறாகிய ஆகாசமெனும் சக்தியாகி, சிவம் சக்தி இரண்டின் கூட்டுச் சேர்க்கையில், விகிதாச்சார அமைப்புக்கேற்ப அணு முதல் அண்டகோடிகளாக விளங்குவதைச் சிந்தனையாற்றல் பெற்ற அனைவரும் அறிவோம்.

பேரியக்க மண்டலமெனும் பிரபஞ்சத்தின் ஆக்கம், நிகழ்வு, முடிவு எனும் மூன்றும் அணுக்கள் கூடுதல், இயங்குதல், பிரிதல் எனும் நிகழ்ச்சிகளேயாகும்.

எனினும், உயிரினங்கள், தோற்றங்கள், காப்பு இவற்றைப் பெண்மையினிடத்தே அருட்பேராற்றல் அமைத்திருக்கும், ஒப்புவித்திருக்கும் பேருண்மையை உணரும்போது எல்லோரும் பெண்ணினத்தின் பெருமையை உணர்ந்து போற்ற வேண்டியுள்ளது" .

" பெண்குலமே மகரிஷி அவர்களுக்கு நன்றிக்கடன் பட்டிருக்கின்றது " என்கிறாள் ஒரு மாணவி.

" இது மாத்திரமல்ல...'சிறப்புணர்ந்த பெண்மதிப்பு' என வேதாத்திரியத்தின் ஒரு அம்சமாகவும், 'மனைவி நல வேட்பு நாள் ' உலகமெங்கும் கொண்டாடவைத்து பெண்ணின் பெருமைகளை எல்லோருக்கும் குறிப்பாக ஆண்களுக்கு உணர்த்தியவர் நம் மகரிஷி அவர்கள். உங்களுடன் சேர்ந்து நன்றி மலர்களை அவர் பாத கமலங்களில் சமர்ப்பிக்கின்றேன் " என முடிகின்றார்கள்  அம்மா.

- தொடரும்

ஆன்மீக ஆனா, ஆவன்னா - 21

" சாமி கும்பிடுவது நல்லதா? தியானம் இருப்பது நல்லதா?"  எனக் கேட்கிறாள் ஒரு மாணவி.

" சாமி கும்பிடுவது என்கிறாயே, நீ என்ன செய்கிறாய் என்பது  பற்றி  சொல் " என்கிறார்கள் அம்மா.

"எனக்குத் தெரிந்த ஸ்லோகங்கள், பாடல்களை மனமுருகி சொல்லி என் தேவைகளை நிறைவேற்ற வேண்டுகின்றேன்"

"இப்படி செய்வதுதான் கடவுளிடம் பக்தி செலுத்துவது, இதுதான் பிரார்த்தனை என பலர் நினைத்து வழிபாடு என்ற பெயரில் இறைவனிடம்  கோரிக்கைகள் வைக்கின்றனர்.  
இது பற்றி காஞ்சி பெரியவர்கள் ' நம் கஷ்டத்தை ஈசுவரனிடம் சொல்கிறபோதே அவனுக்கு அது தெரியாது என்று நாம் நினைப்பதாக, ஆகிறது. ‘இந்தக் கஷ்டத்தைப் போக்கு; அல்லது கஷ்டத்தைப் பொருட்படுத்துகிற மனப்பான்மையை மாற்று’ என்கிறபோது நாம் கேட்டுத்தான் அவன் ஒன்றைச் செய்கிறான் என்றும் ஆகிறது. அதாவது தானாகப் பெருகும் அவனது காருண்யத்துக்குக் குறை  உண்டாக்கிவிடுகிறோம். இப்படி ஞான சமுத்திரமாக, கிருபா சமுத்திரமாக இருக்கிற ஈசுவரனுடைய ஞானம், கிருபை இரண்டுக்கும் தோஷம் கற்பிக்கிற பிரார்த்தனை உண்மையான பக்தி இல்லை' என்கிறார்கள்.
சாமி கும்பிடும் பழக்கம் நம் சின்ன வயதில், அறியாப்  பருவத்தில் ஏற்பட்டது. ஏன் சாமி கும்பிடவேண்டும், கோவிலில்தான் சாமி இருக்கிறாரா, நம்மிடம் இல்லையா என்று எந்த விளக்கமும் பெறாமல் பெரியவர்கள் சொன்னதை கடைபிடிக்கிறோம். இந்த பழக்கம் மூட நம்பிக்கைகளை ஏற்படுத்தி நம்மை ஏமாற்றத்தில் கொண்டு விடுகின்றது.

தியானத்தில் முதலில் மனதை கூர்ந்து கவனித்து ஒருநிலைப் படுத்துகிறோம். பிறகு மனதின் அடித்தளமான உயிரை உணர்கின்றோம். பிறகு உயிரின் மூலமான இறைநிலை உணர்கின்றோம். அப்போது உள்ளுணர்வாக இறைநிலை நமக்கு தேவையானவற்றை உணர்த்தும்.
சுருக்கமாகச் சொன்னால் சாமி கும்பிடும்போது பிரார்த்தனை என்ற பெயரில் நம் தேவைகளை, கோரிக்கைகளை சாமியிடம் சொல்லிக்  கொண்டிருக்கின்றோம். ஆனால் தியானத்தில் இறைநிலை நம்மோடு  உள்ளுணர்வாக பேசுவதை கவனிக்கின்றோம் " என்று முடிக்கிறார்கள் அம்மா.    
                                                      
ஒரு மாணவி " பெண்களாகிய நமக்கு வரக்கூடிய மாதாந்திர பிரச்சனையின்போது  சாமி கும்பிடக்கூடாது போன்ற பல கட்டுப்பாடுகள் உள்ளனவே, அந்த காலங்களில் கடைபிடிக்க வேண்டியவைகளைப் பற்றி சொல்லுங்கள், அம்மா" எனக் கேட்கிறாள்.

" இதைப் பற்றி நானே உங்களுக்குச் சொல்வதாக இருந்தேன். பெண்களுக்கு ஏற்படும் இயற்கையான மாதந்திர உடற் கழிவினை ஒட்டி எத்துனை வேண்டாத சடங்குகள், நம்பிக்கைகள், பயங்கள்! இந்தநாட்களில் பெண்களுக்கு சோர்வு, சலிப்பு, வலி, எரிச்சல் போன்ற உணர்வுகள் ஏற்படுவது இயல்பு. இந்த நாட்களில் ஆரோக்கியம் காக்க உடற்பயிற்சிகள், காயகல்பம் மற்றும் தியானம் தவிர்ப்பது நல்லதுதான்.
மற்றபடி இது சம்பந்தமான மூட நம்பிக்கைகளைப் பொருட்படுத்தாதீர்கள்" என்கிறார்கள் அம்மா.

"இது பற்றி மகரிஷி என்ன சொல்லியிருக்கிறார்கள்?" எனக் கேட்கிறாள் ஒரு மாணவி.

" மகரிஷி  சொன்னதைத்தான் நானும் சொன்னேன். உடல் கழிவுப் பொருட்களை வெளியேற்றுகின்றது. மூத்திரம் நான்கு அல்லது ஐந்து மணி நேரத்திற்கொரு முறை கழிகின்றது. மாதவிடாய் மாதத்திற்கொரு முறை நிகழ்கின்றது. இரண்டுமே கழிவுகள்தான். இவை உடலிலேயே தேங்கி நின்றால்தான் பிரச்சனை.  ஒரு பெண்மணி மகரிஷியிடம் கேட்டாராம் - ' மாதவிலக்கு வந்த பெண் சமைத்ததை சாப்பிடுவீர்களா?' என்று. அதற்கு மகரிஷி அவர்கள் '  ஒ! சாப்பிடுவேன். நீ நினைப்பது புரிகின்றது. அம்மா வயிற்றில் கருவாக இருந்தபோது இதை சாப்பிட்டுதான் வளர்ந்தேன். பிறந்து வெளியே வந்தவுடன் இக்கழிவுதான் பாலானது. அதையும்தான் சாப்பிட்டேன். இப்போது மட்டும் மாதவிலக்கு பெண் சமைத்ததில் எப்படி குற்றம் காணமுடியும்' என்று கேட்டார்களாம்.
மகரிஷி அவர்கள் பாடல் ஒன்றை இங்கு நினைவு கூர்கின்றேன் -

' தகப்பனுடைய ஒருகழிவைத்   தாயார் ஏற்று 

தன்கழிவை அதனோடு சேர்த்துச் சேர்த்து 

மிகப் புனிதமெனும் இந்த உடலை ஈந்தாள் 

மீண்டும் அவள் உடல் கழிவைப் பாலை உண்டோம் 

சுகப்பிணைப்பின் அடையாளமான இந்தச் 

சுக்கில சுரோணிதம் சேர்ந்து உருவாய் வந்த 

முகப்பினையே உடல் வளர்ச்சி பெற்ற பின்னர் 

முன்நினைவால் நாடுவதே மோகம் ஆகும்'

இயற்கை நம் உடல் ஆரோக்கியத்திற்காக தன கடமையை செய்கின்றது. இயற்கையோடு ஒத்து போவதுதான் நலம் பயக்கும். இதுபற்றி தெளிவாக தெரிந்துகொள்ள ஒரு தனி வகுப்பு நடத்துவது நன்றாக இருக்கும். சிறந்த டாக்டர்களைக் கொண்டு இந்த வகுப்பு நடத்த உங்கள் பள்ளி நிர்வாகத்துடன் பேசுகிறேன்" என்கிறார்கள் அம்மா.

"மிக்க நன்றி, அம்மா! பெண்கள் பற்றி பெரும்பாலும் மதநூல்களில் இழிவாய் சொல்லியிருக்கின்றார்களே, கேட்கும்போது மிகவும் வருத்தமாக உள்ளது. ஏன் இப்படி எழுதியுள்ளார்கள்?" எனக் கேட்கிறாள் ஒரு மாணவி.

- தொடரும் 

ஆன்மீக ஆனா, ஆவன்னா - 20

" என் இனிய மாணவச் செல்வங்களே! இதுவரை ஆன்மிகம் பற்றிய அடிப்படைகளை விஞ்ஞானக் கண்ணோட்டத்தில் உங்களுக்குத் தெளிவு படுத்தியுள்ளேன்.  இவற்றைப் பற்றி மேலும் சிந்தியுங்கள். நீங்கள் எல்லோரும் மனநிறைவுடனும், வாழ்வில் சிக்கல் ஏதுமில்லாமல் மகிழ்வுடன் வாழஇறைநிலை நின்று வாழ்த்துகின்றேன்.  ஆரம்பத்தில் நீங்கள் என்னிடம் கேட்ட கேள்விகளுக்கு நீங்களே பதில்சொல்லுமளவிற்கு தெளிவு பெற்றுவிட்டீர்கள். ' சாமின்னு ஒன்னு இருக்கா?' ன்னு கேட்ட  மாணவி  இப்ப பதில் சொல்லலாம் " என அம்மா சொல்ல

" தூணிலும் இருப்பான்; துரும்பிலும் இருப்பான் என்பது இறைநிலையைக்  குறிப்பது என்பதைத் தெளிவாக புரிந்துகொண்டேன் அம்மா " என்கிறாள் அந்த மாணவி.

"இறைநிலையை பற்றி உணராமலேயே இருந்துவிட்டால் என்ன ஆகிவிடும்? " என ஒரு மாணவி கேட்கின்றாள்.

" நீ கேள்வி  கேட்டவிதம் பிரமாதம்! இறைநிலை விளக்கம் கேட்டதால் உன் கேள்வியை இப்படி கேட்டுள்ளாய். சாதாரணமானவர்கள் 'நான் சாமி கும்பிடாவிட்டால் சாமி என்னைத் தண்டிப்பாரா?' எனக் கேட்பார்கள்.
நீ வேலைக்குப் போன பிறகு உன்னை அமெரிக்கா போகச் சொல்லி அனுப்புகின்றார்கள். தனியாக போகவேண்டும். என்ன செய்வாய்?" என அம்மா கேட்கின்றார்கள்.

" பயணத்திற்கு வேண்டிய அத்துணை ஏற்பாடுகளையும் செய்வேன். எல்லாவிதமான தகவல்கள், தொடர்பு முகவரிகள் அனைத்தையும் எடுத்துக் கொள்வேன்" என்கிறாள் மாணவி.

"சரி. விமானப் பயணம் உனக்கு புதிது. என்ன பண்ணுவாய்?"

"பக்கத்தில் அமர்ந்திருப்பவரிடம் கேட்டுத் தெரிந்துகொள்வேன்" என்கிறாள் மாணவி.

" சரியாகச் சொன்னாய். உன் பயணம் சிறப்பாக இருக்க அனுபவம் மிக்க நபர்களிடமிருந்து தேவையானவற்றை கேட்டுத் தெரிந்து கொள்வதுபோல நம் வாழ்க்கைப் பயணம் மிக சிறப்பாக நடைபெற எல்லாம் வல்ல, எல்லாம் அறிந்த உன்னிடமே உள்ள இறைநிலையை துணை கொள்ளலாம் அல்லவா! இறைநிலையை உணர்ந்துகொண்டால் வாழ்வில் நீ விரும்பும்  அனைத்தும் மற்றும் நிம்மதி, மகிழ்ச்சி   எல்லாமே அனுபவிக்கலாம்" என்கிறார்கள் அம்மா.

" வாழ்வின் நோக்கமே இறைநிலை உணர்தல், அதை அடைதல் என நீங்கள் ஏற்கனேவே சொல்லியிருக்கின்றீர்கள் அம்மா " என்கிறாள் ஒரு மாணவி.

" தியானம் செய்யும்போது எந்த திசையைப் பார்த்து உட்கார வேண்டும்?" எனக் கேட்கிறாள் ஒரு மாணவி.

" நாம் வசிக்கும் பூமியில்தான் திசைகளைப் பயன்படுத்துகின்றோம். துரியாதீதத் தவத்தின்போது சந்திரன், சூரியன் என பேரியியக்க மண்டலத்தில் விரிகின்றோம். அங்கு திசைகளோ, மேல்,கீழ் போன்றவைகள் கிடையாது. எனவே எந்த திசை நோக்கியும் அமர்ந்து தவம் செய்யலாம்" என்கிறார்கள் அம்மா.

" கிழக்கு திசை, வடக்கு திசை தவம் செய்ய உகந்தது என பெரியவர்கள் சொல்கிறார்களே" என்கிறாள் ஒரு மாணவி.

"முன்பெல்லாம் அதிகாலையில் எழுந்து ஆற்றிலோ, குளத்திலோ குளித்துவிட்டு கிழக்கு நோக்கி அமர்ந்தது ஜபம் அல்லது தியானம் இருப்பார்கள். முடிக்கும்போது சூரியோதயம் அவர்கள் மனதிற்கு மிக இனிதாக அமையும். இன்றோ சூரிய உதயத்தைப் பார்க்க முடியாமல் கட்டிடங்கள் மறைத்து நிற்கின்றன. வடக்கு திசையிலிருந்து தெற்கு நோக்கி பூமியின் காந்த மண்டலம் இயங்குகின்றது. இதை ஒட்டி வடக்கு நோக்கி அமர்ந்து தவம் பண்ணும் பழக்கமும் ஏற்பட்டது. நீங்கள் இதைப் பற்றி எல்லாம் கவலைப் படாமல் 'நான் அமர்ந்துள்ள இடத்தைச் சுற்றிலும் நல்ல தெய்வீக ஆற்றல் நிறைந்துள்ளது' என்ற உணர்விலே தவறாமல் தவம் செய்யங்கள்" என்கிறார்கள் அம்மா.

" சாமி கும்பிடுவது நல்லதா? தியானம் இருப்பது நல்லதா?" என்கிறாள் ஒரு மாணவி.

- தொடரும்

ஆன்மீக ஆனா, ஆவன்னா - 19

"அம்மா, மேதகு அப்துல் கலாம் மாணவர்களுக்குச் சொன்ன அறிவுரைகளை தெரிவித்தீர்கள் அல்லவா, அவற்றை எங்கள் பள்ளி தாளாளர் அவர்கள் அழகாக அச்சிட்டு எல்லா மாணவ, மாணவிகளிடம் தந்துள்ளார்.   அசெம்பளி கூட்டத்தில் நாங்கள் இவற்றைப் படித்து உறுதி எடுத்துக் கொண்டோம் " என்கிறாள் ஒரு மாணவி.

" மிகவும் மகிழ்ச்சி. தாளாளருக்கு நன்றியும், பாராட்டுகளையும் என் சார்பில் தெரிவித்து விடுங்கள் " என்கிறார்கள் அம்மா.

 "நீ யாராக இருந்தாலும் பரவாயில்லை உன்னால் வெற்றியடைய முடியும். இது நான் என்னுடைய வாழ்வில் நான் கற்றுக்கொண்ட பாடம் என மேதகு அப்துல் கலாம் சொன்னது என் சகோதரனுக்கு ஒரு புது உற்சாகத்தைத் தந்தது " என்கிறாள் ஒரு மாணவி.

" நம் மகரிஷி  அவர்களும் ' உனக்கு உடல் இருக்கா, உயிர் இருக்கா இந்த தகுதி போதும் ஆன்மீகப் பயிற்சிகள் பெற்று முன்னேற ' " என்கிறார்கள் அம்மா.

" மகரிஷி அவர்கள் மாணவர்களிடம் பேசியிருக்கின்றார்களா? " என ஒரு மாணவி கேட்க

" நிறைய தடவை.....  சென்னையில், கோவையில்  கல்லூரிகளுக்கேச்  சென்று மாணவர்கள் மேம்பட என்னென்ன பயிற்சிகள் மேற்கொள்ள வேண்டுமென அறிவுறித்தியிருக்கிறார்கள். அமெரிக்கா  சென்றிருந்தபோது  பல்கலைக்கழக பேராசிரியர்கள் மற்றும் மாணவர்களிடம் உரையாற்றி யிருக்கின்றார்கள்" என்கிறார்கள் அம்மா.

" மாணவர்களுக்கு மகரிஷி அவர்கள் சொன்ன அறிவுரைகளைச் சொல்லுங்களேன் " என மாணவிகள் கேட்கின்றனர்.

"மகரிஷி பேசியதை அப்படியே உங்களுக்குச் சொல்கின்றேன்...

'  மனித வாழ்வில் மாணவப்பருவம் மிக்க மதிப்புடையது. வயதுக்கும், அறிவுக்கும், கடமைக்கும் இணைப்புக் காட்டி முன்னோர்கள் மனிதனுடைய வாழ்வை நான்கு வகையில் பிரித்தார்கள். அவை 1. இளமை நோன்பு 2. இல்லறம் 3. அகத்தவம் 4. தொண்டு என்பனவாகும். ஒன்றன்பின் ஒன்றாக முறையோடு இவற்றைப் பயிற்சி செய்வதற்காக வேறுபடுத்தியும், வரிசைப்படுத்தியும் பேசப்பட்டனவேயோழிய, வாழ்வில் பொறுப்பேற்ற ஒவ்வொருவருக்கும் இந்நான்கு பண்பாடுகளும் வாழ்வில் இணைந்தே செயலாக வேண்டும்.

இந்நான்கு பிரிவுகளில் " இளமைநோன்பு"  என்ற ஒன்றைப்    பயிலும்  காலம்தான்  மாணவப் பருவம். மனிதன் சிறப்புற, வாழ்வில் வளம் பெற  மாணவப் பருவமே ஏற்றதோர் பயிற்சிக் காலம்.  நல்வாழ்வின் இன்றியமையாத தேவைகளான 1. எழுத்தறிவு  2. தொழிலறிவு 3. இயற்கை தத்துவ அறிவு  4. ஒழுக்க பழக்கங்கள் என்ற நான்கும் இணைந்ததே முழுமையான கல்வியாகும். இவற்றைப் பயின்று கொள்ளவேண்டிய  பொருத்தமான, இன்றியமையாத காலம் மாணவப் பருவமே.  எழுத்தறிவு, தொழிலறிவு  இரண்டும் இன்று  விரிவாக எல்லாப் பள்ளிகளிலும் கல்வி முறையில் பாடத்திட்டங்களாக  கற்றுத் தரப்படுகின்றன. இயற்கைத் தத்துவ அறிவும், செம்மையான வாழ்வுக்கு ஏற்ற    ஒழுக்க பழக்கங்களும் அகத்தவதாலன்றி க்  கிட்டாது.  மாணவர்களுக்குப்  படிப்பில்  மனம்  நிலைக்க,  ஒவ்வொரு துறையிலும் ஆழ்ந்து பொருள் உணர, அவற்றை  நினைவிலே வைத்துக்கொள்ள , போதிய மனவலுவு, கூர்மை, நுண்மை ஆகிய இவை  அகத்தவம் ( தியானம் ) என்ற உளப்யிற்சியினால்தான்  கிடைக்கின்றது.

 உடல், உயிர், மனம், மெய்ப்பொருள்  இந்நான்கின் நிலைகளையும்  இவை ஒன்றோடொன்று இணைந்த உறவுகளையும்  தெளிவாகத் தெரிந்து   கொள்ளும்போதுதான்  ஒருவர் விஞ்ஞானக் கல்வியில் எந்த பகுதியிலும்  சிறந்து விளங்க முடியும். பொருளியல், உயிரியல், உளவியில், கருவியியல், சமூகயியல் ஆகிய விஞ்ஞானங்கள் வேறு வேறாகத் தோன்றியபோதிலும்  உண்மையில் இவை எல்லாவற்றிலும்  ஊடுறுவிய  தொடர்பு  இருக்கின்றது.  இக்கல்விகளில்  ஆழ்ந்த பொருளுணர்ந்து  கருத்தோடும், பொறுப்போடும்  தேர்ச்சி பெற அகத் தவப்பயிற்சி  இன்றியமையாத  துணையாகும். மேலும் மனிதனிடம் அடங்கியுள்ள ஆற்றல்களை  முறைபடுத்த வேண்டுமாயின்
இளமைநோன்பு  காலமாகிய மாணவப் பருவம்தான் சிறந்தது.
அறிவு,  ஆற்றல் சிதறாமல்  செயல்கள் நெறி பிறழாமல் ஒன்றோடொன்றி இணைந்து சிறப்புற மாணவப் பருவத்திலேயே  பயிற்சி செய்து கொள்ள வேண்டும்.

இப்பருவத்தை நழுவவிட்டால், தேவையற்ற துன்பங்களும், சிக்கலும் விளைவிக்கத்தக்க எண்ணங்களும், செயல்களும் இடம் பிடித்துக் கொள்ளும். பிற்காலத்தில்  இவற்றை மாற்றி ஒழுங்குபடுத்தி நலம் காண்பதில் மிகுதியான முயற்சி எடுக்க வேண்டும்.

மாணவப் பருவத்தில் எழுத்தறிவு, தொழிலறிவு இரண்டை மட்டுமே வளர்த்துக் கொண்டு  இயற்கை தத்துவம், ஒழுக்க பழக்கங்கள் இவற்றை அலட்சியம் செய்து விட்டால் வாழ்க்கை எனும் இன்ப ஊற்று நச்சு ஆகி விடும். வறண்டு போகும்

எனவே மாணவப் பருவத்தில் அகத்தவம் பயின்று மனத்தூய்மையும், வினைத்தூய்மையும் பெறும் மாணவர்கள் வாழ்க்கையில் சாதனைகள் நிகழ்த்தப்போவது நிச்சயம் '

" என்ன மாணவிகளே, மகரிஷி  அவர்கள் கூறியதைக் கேட்டீர்களா " என 
அம்மா கேட்க 

 "மனவளகலைப் பயிற்சிகளை உடனடியாக கற்று சாதிக்கப்போகிறோம் "
என்கிறார்கள் மாணவிகள்.

 - தொடரும் 

ஆன்மீக ஆனா, ஆவன்னா - 18

"இனிய மாணவச் செல்வங்களே !இப்போது நாங்கள் செய்ய வேண்டியதென்ன எனக் கேட்டீர்கள். இது பற்றி நம் மகரிஷி அவர்கள் முப்பது ஆண்டுகளுக்கு முன் பல தடவை  பள்ளி, கல்வி மாணவர்களிடையே பேசியிருக்கின்றார்கள். இன்று அந்த தொண்டினை நமது முன்னாள் ஜனாதிபதி மேதகு அப்துல் கலாம் அவர்கள் செய்து வருகின்றார்கள் " என அம்மா சொன்னதும்

" எங்கள் பள்ளியிலும் உயர்திரு அப்துல் கலாம் அவர்கள் மாணவர்களுக்கு அறிவுரை சொல்லியிருக்கிறார் " என ஒரு மாணவி கூறுகிறாள்.

" நல்லது. முதலில் மேதகு அப்துல் கலாம் சொன்ன அறிவுரைகள் பற்றி தெரிந்து கொண்டு பிறகு மகரிஷியின் வழிமுறைகள் பற்றித் தெரிந்து கொள்ளலாம்.

'அப்துல் கலாம் அவர்கள்:

மாணவர்களே! இன்றைக்கு என் வாழ்வில் கண்ட அனுபவங்கள், என் ஆசிரியர்கள், அவர்களிடம் இருந்து நான் கற்றுக்கொண்ட அரிய எண்ணங்கள், சில அருமையான புத்தகங்கள் எவ்வாறு என் வாழ்வின் சிந்தனையை மாற்றியது. எல்லாவற்றையும் விட என் வாழ்வில் எனக்கு கிடைத்த ஒரு புனிதமான கருத்து என்னவென்றால், நீ யாராக இருந்தாலும் பரவாயில்லை உன்னால் வெற்றியடைய முடியும். இது நான் என்னுடைய வாழ்வில் நான் கற்றுக்கொண்ட பாடம். அதை உங்களுக்கான என்னுடைய உரையில் இருந்து 8 உறுதிமொழிகளாக உருவாக்கி இருக்கிறேன். அதை உங்களுடன் பகிர்ந்து கொள்ள விரும்புகிறேன். நீங்கள் எல்லாம் ரெடியா? என்னுடன் திருப்பி சொல்கிறீர்களா? எங்கே சொல்லுங்கள் பார்ப்போம்.

மாணவர்களுக்கான 8 உறுதிமொழி

1. எனக்குள் ஒர் அரும்பெரும் சக்தி புதைந்துள்ளது. வெற்றி எண்ணத்தை என்றென்றும் வளர்த்து, என் சக்தியாலேயே, நான் வெற்றி அடைந்தே தீருவேன்.

2. ஒவ்வொருநாள் வகுப்பிலும், ஆசிரியர் சொல்லிக்கொடுக்கும் பாடங்களையும், அறிவியல் பாடங்களையும், கணித கணக்குகளையும், சமூகவியல் பாடங்களையும், அன்றைய நாளே, அன்றைய இரவே, நானே அந்த அறிவை உள்வாங்கி, புரிந்து, எழுதி எழுதி படிப்பேன். இந்த முறையான படிப்பின் மூலம் என் உள்ளத்தின் ஆழ் மனதில் ஒவியம் போல் பதிந்துவிடும் படி நான் கற்று உணர்ந்து, தெளிவேன்.

3. அறிவுப்பெட்டகமாக திகழும் எனது ஆசிரியர்கள் வாழ்வு முறையை அறிந்து, தெரிந்து, அவர்களை மதித்து அதன்படி நடந்து என் வாழ்வை செம்மைப்படுத்துவேன்.

4. பெற்றோர்களிடம் இருந்து நல்லொழுக்கத்தை கற்பேன், ஆசிரியர்களிடம் இருந்து அறிவார்ந்த லட்சியத்தை அடைவேன்.

5. என்னால் எதைக் கொடுக்க முடியும் என்ற லட்சியத்தை என் உள்ளத்தில் உருவாக்குவேன். நான் பெற்ற அறிவை அனைவருக்கும் கொடுப்பேன், அன்பை கொடுப்பேன், பண்பை வளர்ப்பேன், மற்றவர்களை மதிப்பேன் எல்லாவற்றிற்கும் மேல் அனைவரிடமும் நட்பை வளர்பேன்.

6. நான் வெற்றி பெறுவேன், மற்றவர்கள் வெற்றியையும் கொண்டாடி மகிழ்வேன்.

7. பெற்றோர்கள் உதவியுடன், நான் என் வீட்டில் ஒரு சிறு நூலகம் அமைத்து, தினமும் ஒரு 30 நிமிடமாவது புத்தகங்களைப் படிப்பேன்.

8. இன்றையில் இருந்து என் மனதில் ஒர் உன்னத லட்சியம் உதயமாகிவிட்டது; அறிவை தேடி, தேடி, சென்றைடைவேன்; கடினமாக உழைப்பேன்; பிரச்சனைகளை கண்டு பயப்படமாட்டேன்; தோல்வி மனப்பான்மைக்கு தோல்வியை கொடுத்து, விடாமுயற்சி செய்து எனது உன்னத லட்சியத்தை வென்றடைவேன்.

நல்லொழுக்கம் 

உழைத்துக் கொண்டே இருக்க வேண்டும். அத்துடன் விடாமுயற்சி இருந்தால்,   வெற்றி உங்களை வந்து சேரும். வரலாற்றின் பக்கங்களில் நம் ஒவ்வொருவருக்கும் ஒரு பக்கம் ஒதுக்கப்பட்டுள்ளது. அதை உலகம் படிக்க வைப்பது, நமது கையில்தான் உள்ளது. எந்த மாயவலையிலும் விழமாட்டேன் என்ற உறுதி இருந்தால், வரலாற்றுப் பக்கத்தில் நீங்களும் இடம் பிடிப்பீர்கள்.வாழ்வில் வெல்ல 5 விஷயங்கள் அவசியம்.

முதலில் லட்சியம் வேண்டும்.
அதை அடையக் கூடிய அறிவைத் தேடிப்பெற வேண்டும்.
அதற்கு கடும் உழைப்பு வேண்டும்.
பிரச்னைகளைக் கண்டு பயப்படக் கூடாது.
பிரச்னைகளைத் தோல்வியடையச் செய்து, வெற்றியடைய  விடாமுயற்சி வேண்டும்;
எல்லாவற்றுக்கும் மேலாக நல்ல ஒழுக்கம் வேண்டும்.

குடும்பத்துக்கும், நாட்டுக்கும், உலகிற்கும் நல்லதொரு அங்கமாக இருப்பேன் என்ற உறுதி உங்களுக்கு இருக்க வேண்டும். நீங்கள் அனைவரும் சமூகத்தில் பொறுப்புள்ள மனிதர்களாக மாற வேண்டும்;'

" மாணவச் செல்வங்களே, கலாம் அவர்கள் சில ஆண்டுகளுக்கு முன் ஆழியார் அறிவுத் திருக்கோயிலில்  நடந்த பட்டமளிப்பு விழாவில் பேசியபோது நல்லொழுக்கத்தின் மூலம் எப்படி  விழிப்புணர்வு கொண்ட சமுதாயத்தை உருவாக்கலாம் என்பது பற்றியும் மகரிஷி அவர்களின் மனவளக்கலை ஒன்றுதான் மாணவர்களை மிக சிறந்த மனிதர்களாக மாற்றி எதிர்கால இந்தியாவை ஏற்றமிக்கதாக உருவாக்கும் என்றார். இனி மாணவர்களுக்கு மகரிஷி என்ன அறிவுறித்தினார் என பார்க்கலாம்" என ஆரம்பித்தார் அம்மா.

 - தொடரும் 

ஆன்மீக ஆனா, ஆவன்னா - 17

ஆன்மீகப் பயணம் 

ஆன்மீகப் பாதையில் எடுத்து வைக்கப்போகும் முதல் அடி பற்றி தெரிந்து கொள்ள மாணவிகள் ஆர்வமாக இருக்கின்றனர்.

" நமது பிரச்சனைகளுக்கும், துன்பங்களுக்கும் நாம்தான் காரணம் என்று எப்போது நாம் உணர்கின்றோமோ அப்போது நாம் ஆன்மீகப் பாதையில் அடியெடுத்து வைத்து விட்டோம் என்று நிச்சயமாக  சொல்லலாம்.  பொதுவாக மக்கள் தங்கள் கஷ்டங்களுக்கு மற்றவர்களை குறை சொல்லி அவர்கள் திருந்த அறிவுரை சொல்லிக்கொண்டிருப்பார்கள். தன்னிடத்தில் உள்ள குறைகளை உணரவும், தன்னைத் திருத்திக் கொள்ளவும் சிறிதும் முயல மாட்டார்கள்.  மற்றவர்கள் மீதே பழி சொல்லி, மற்றவர்களைப் பற்றியே பேசிக் கொண்டிருப்பார்கள். நீங்கள் எப்படி?" என அம்மா கேட்க,

" நீங்கள்தான் ஆன்மீகப் பாதையை காட்டிவிட்டீர்களே, எங்கள் குறைகளை உணரத் தொடங்கிவிட்டோம் " என்கிறார்கள் மாணவிகள்.

" உணர்ந்தால் மட்டும் போதாது. மனம் பண்பட பயிற்சிகள் வேண்டும். உதாரணமாக ஒருவர் உங்களை திட்டிவிட்டார் என வைத்துக்கொள்வோம். உங்கள் மனம் உடனே துன்பப் படுகின்றது. உணர்ச்சி வசப்பட்ட மனோநிலையில் நீங்கள் இருந்தால் உங்களை திட்டியவரிடம் சண்டை போட்டிருப்பீர்கள் அல்லது  மேலும் உணர்ச்சி வசப்பட்டு வேண்டாத செயல்களை செய்திருப்பீர்கள். நீங்கள் அமைதியாக சிந்தித்தால் திட்டியவரின் சொல்லா நம்மை புண்படுத்தியது .....இல்லையில்லை...என் மனம்தான் அந்த சொல்லை துன்பமாக மாற்றியது என்பதை   உணரலாம். இப்படி அமைதியாக, விழிப்புணர்வுடன் ஒவ்வொன்றையும் சிந்தித்து, சிந்தித்து செயல் படுபவன் ஆன்மீகப் பாதையில் பயணம் செய்து கொண்டிருக்கின்றான் என்பது அர்த்தம். பக்குவப்படும் மனம் பண்பட்டு, பண்பட்டு ஆன்மீக சாதனைகளுக்குத் தயாராகின்றது" என்கிறார்கள் அம்மா.

" எப்போதுதான்  ஆன்மீகப் பயணம் நிறைவு பெறும்?" என மாணவிகள் கேட்கின்றனர்.

" கருமையத்தூய்மைக்கான வழிமுறைகள் பார்த்தோமல்லவா, அவற்றை விழிப்புணர்வோடு கடைப்பிடித்து வரும்போது மனதில் எப்போது இன்பமும், துன்பமும் அற்ற ஒரு மனோநிலை வருகின்றதோ இன்னும் சொல்லப்போனால் எப்போது மனம் சலிப்பில்லா ஆனந்தத்தை அனுபவிக்கின்றதோ அப்போது  ஆன்மீகப் பயணம் நிறைவு பெறுவதாகக் கொள்ளலாம்."

"கொஞ்சம் விளக்கமாகச் சொல்லுங்கள், அம்மா " என மாணவிகள் கேட்க,

" பிரச்சனைகளுக்கும், கஷ்டங்களுக்கும் காரணம் மற்றவர்களும் அல்ல, நாமும் அல்ல என்ற மனோநிலை அடையும்போது ஆன்மீகத்தில் முழுமை பெறுகின்றோம். இந்த நிலை அடையும்போது  ஆன்மீகப் பயிற்சிகள் நிறைவு பெற்றிருக்கும்.  மனம் அன்பும், கருணையும் நிறைந்து பார்க்கும் தோற்றங்களெல்லாம் இறைதோற்றமாகக் கொள்ளும். புற சூழ்நிலைகள் எதுவும் மனதைப் பாதிக்காது. மனம் தன்னையும்  நொந்து கொள்ளாது. உடலாலும், மனதாலும் யாருக்கும் உதவ, மற்றவர் துன்பம் தீர்க்க எப்போதும் தயாராக இருப்பார்கள். செய்துகொண்டும் இருப்பார்கள்." என்கிறார்கள் அம்மா.

" ஆன்மிகம் என்பது இவ்வளவுதானா?" என வினவுகின்றனர் மாணவிகள்.

" மேலும் இருக்கின்றது..நம் மகரிஷி அவர்கள் விளக்கியுள்ள ' நான் யார் ' தத்துவத்தையும்  ' பிரம்ம ஞானத்தையும்' பழக, பழக எல்லா உயிர்களும் ஒன்று, எல்லா தோற்றங்களும் ஒன்று, எல்லாமே இறைநிலையின் வெளிப்பாடு என்ற உணர்நிலையில் வாழலாம். நம்மை அறியலாம். பிறரை அறியலாம். இயற்கையை அறியலாம்.இறைநிலையின் பிரதிபிம்பம் நாம்தான் என்ற உணர்நிலையில் அன்பும், கருணையுடன் தொண்டாற்றி   இன்பம் காண்போம்." என முடிக்கின்றார்கள் அம்மா.

" அப்படியெனில் இந்த மாணவப் பருவத்தில் நாங்கள் செய்ய வேண்டியதென்ன?" என கேட்கின்றார்கள் மாணவிகள்.

-  தொடரும் 

ஆன்மீக ஆனா, ஆவன்னா - 16

ஆன்மீகம்  அறிவோம் 

" இனிய  மாணவச் செல்வங்களே! நமது ஆன்மீக ஆனா, ஆவன்னா பாடத்தில்ஆன்மீகம் பற்றி இப்போது பேசப்போகின்றோம். ஆன்மீகத்தைப் பற்றி நன்கு அறிந்து கொள்ளத்தான் நாம் பலபல விஷயங்களைப் பற்றி விவாதித்தோம். இன்றைக்கு மக்கள் ஆன்மீகம் என்ற சொல்லை மட்டும் நன்கு தெரிந்து வைத்திருக்கின்றனர்.  ஆனால், ஆன்மீகத்தைப் பற்றி புரிந்து கொண்டிருக்கின்றார்களா என்பது சந்தேகமே!    பொதுவாக   ஆன்மீகம் என்றால்  வழிபாட்டு தலங்களுக்குச் செல்வது, புனித பயணங்கள் மேற்கொள்வது, புனித நூல்களைப் படிப்பது என்று மக்கள் நினைத்துக் கொண்டிருக்கின்றார்கள். ஆன்மீகம் என்றால் என்ன என்பதை நீங்கள் சொல்லுங்கள் பார்க்கலாம்.." என மாணவிகளிடம் கேட்கின்றார்கள் அம்மா.

"நீங்கள்தான் எங்களுக்குத் தெளிவாக விளக்கிவிட்டீர்களே அம்மா! ஆன்மாவைப் பற்றி, அதாவது கருமையத்தைப் பற்றியும் அதனை தூய்மை செய்யும் வழிமுறைகள் பற்றியும் தெரிந்து அதன்படி நடப்பதுதான் ஆன்மீக வாழ்வு என்று சொன்னீர்களே அம்மா!" என்கிறார்கள் மாணவிகள்.

" சபாஷ்! சரியாகச் சொன்னீர்கள். தவம் மாத்திரம் செய்பவர்கள் ஆன்மீகவாதிகள் ஆகிவிட மாட்டார்கள். நம் புராணங்களில் வரும் இராவணன், சூரபத்மன் மற்றும் ஹிரண்யன் போன்றவர்கள் கடும் தவம் செய்தார்கள், இறைவனிடம் வரங்கள் வாங்கினார்கள். ஆனால் அவர்களை ஆன்மீகவாதிகள் என்று சொல்லமுடியுமா? உண்மையான ஆன்மீகவாதிகள் ஆன்மாவைப் பற்றி தெளிவாக அறிந்து கருமையத்தூய்மைக்கான நெறிமுறைகளுடன் வாழ்வதாகும். ஆன்மீகத்தின் அடிப்படை எப்போதும் அமைதியாகவும், ஆனந்தமாகவும் இருப்பதுதான், ஆன்மீகவாதிகள் அன்புமயமானவர்கள். நமது மகரிஷி அவர்கள் 

அனைத்துயிரும் ஒன்றென்று 

அறிந்த அடிப்படையில் 

ஆற்றும் கடமைகளெல்லாம் 

அன்பின் செயலாகும்

என்று நமக்கு பிரம்மஞானம் தந்து இறையுணர்வையூட்டி 'அன்பே இறைவன்' என்ற உயர்நிலைக்கு நம்மை அழைத்து செல்கிறார்கள். நம் மனவளக்கலைப் பயிற்சிகள் அனைத்தும் ஆன்மீகப் பயிற்சிகளாகும்.," என்கிறார்கள் அம்மா.

"ஆன்மீகம் என்ற சொல்லுக்கு சரியான பொருள் என்ன?" எனக் கேட்கிறாள் ஒரு மாணவி.

" ஆன்மாவைப் பற்றி தெளிவாக புரிந்துகொள்வோம் - . ஏற்கனவே நாம் இறைவனை வழிபடும்போது உண்மையில் அவரவர் எண்ணங்களைத்தான் வணங்குகின்றோம் என்றும் எண்ணங்கள் மனதிலிருந்து எழுகின்றன. மனமோ உயிரின் படர்கை நிலை. உயிரின் மூலமோ கருமையம். இந்த கருமையத்தூய்மைக்குத்தான் இரண்டொழுக்கப் பண்பாடு கடைபிடிக்கின்றோம். ஆன்மாவை உணர்வது என்றால் ' தன்னை உணர்வது' என கொள்ளலாம்.

" நான் உண்மையிலேயே ஆன்மீகப் பயிற்சிகளில் ஈடுபட்டுக்கொண்டிருக்கின்றேனா என்பதை எப்படி அறிவது" என்கிறாள் ஒரு மாணவி.

" மிகவும் சுலபமாகத் தெரிந்து கொள்ளலாம். யாரெல்லாம் தங்கள் துன்பங்கள்,  பிரச்சனைகள், கஷ்டங்கள்  இவற்றிற்கு மற்றவர்களையும், சூழ்நிலைகளையும்  காரணமாகச் சொல்லி புலம்பிக் கொண்டிருக்கின்றார்களோ அவர்கள் இன்னும் ஆன்மிகம் பக்கம் அடியெடுத்து வைக்கவில்லை என்று அர்த்தம் " என அம்மா சொன்னதும்  மாணவிகள் சிரிக்கின்றனர். 

" ஆன்மீகப் பாதையில் எடுத்துவைக்கும் முதல் அடி எது தெரியுமா?" என அம்மா கேட்கின்றார்கள்.

- தொடரும்

ஆன்மீக ஆனா, ஆவன்னா - 15

ஆன்மீகத் தேடல்

 வேறு என்னென்ன வழிகளில் கருமையத்தைத் தூய்மை செய்யலாம் என மாணவிகள் கேட்டதற்கு அம்மா சொல்கிறார்கள் -

" இரண்டொழுக்கப் பண்பாட்டிலேயே எல்லாம் அடங்கி உள்ளன. இதை எப்படி எல்லாம் கடைபிடிக்கலாம் என்பதை பார்க்கலாம். ' யாருடைய உடலுக்கும், மனதிற்கும் துன்பம் தரமாட்டேன்' என்ற முதல் ஒழுக்கத்தை எடுத்துக் கொண்டு முதலில் உங்களை ஆராய்ந்து பாருங்கள். உங்கள் உடலுக்கு, மனதிற்கு  நீங்கள் துன்பம் தராமலிருக்க என்னென்ன பண்ணவேண்டும்?"

" தினமும் உடற்பயிற்சிகள், காயகல்ப பயிற்சிகள் மற்றும் தவம் செய்ய வேண்டும்" என்கிறார்கள் மாணவிகள்.

" சரியாகச் சொன்னீர்கள். உடற்பயிற்சி செய்வதால் உடலில்  உள்ள வெப்பம், ரத்தம், காற்று, ஜீவகாந்தம் மற்றும் உயிர் ஓட்டங்கள் சீரமைக்கப்பட்டு உடல் துன்பங்கள் நீங்குகின்றன. நோய் வராமலும் தடுக்கின்றோம். தவப் பயிற்சிகள் அடிக்கடி செய்வதால் மனஒர்மை ஏற்படுகின்றது. இன்னும் நீங்கள் இறைநிலை தவம் அடிக்கடி செய்து   இறைநிலையோடு ஒன்றி நிற்க பழக வேண்டும். மேலே என்ன செய்ய வேண்டும்?" எனக் கேட்கிறார்கள் அம்மா.

" யாரிடமும் சண்டை போடாமல், மனதில் பகை, வஞ்சம் வைத்துக் கொள்ளாமல் மன்னித்து கருணை உள்ளத்தோடும் இன்முகத்தோடும் இருக்கவேண்டும்" என்கிறார்கள் மாணவிகள்.

" சபாஷ்! இப்போது மற்றவர்களுக்கு எப்படி துன்பம் தராமல் இருக்க என்ன செய்ய வேண்டும் என்று சொல்லுங்கள் ".

" சாதி, மத, நாடு, இன, மொழி வேறுபாடின்றி எல்லோருமே நம் சகோதர, சகோதரிகள் - இறைநிலையின் வடிவங்கள், அவர்களுக்குள்ளும் அறிவே தெய்வமாக விளங்குகின்றது என்ற உணர்வில் எல்லோரையுமே தெய்வங்களாகப் பார்க்கவேண்டும், மதிக்க வேண்டும்" என்கிறார்கள் மாணவிகள்.

" மிகவும் மகிழ்ச்சியாக இருக்கின்றது. மகரிஷி அவர்களின் கனவுகளை நனவாக்கும் அருட்தொண்டில் ஈடுபடப்போகும் உங்களை நினைத்தால் பெருமையாக இருக்கின்றது. நீங்கள் எப்போதும் ஒழுக்கம், கடமை, ஈகை இவை மூன்றுமினைந்த அறநெறிப் படிகளை பின்பற்றி வாழ வேண்டும். நம்மை சார்ந்த பெற்றோர்கள், வாழ்க்கைத் துணைவர் மற்றும் நம் குழந்தைகளுக்கு நம் பொறுப்புணர்ந்து அக்கறையோடு காத்து உதவ வேண்டும். தாய் , தந்தை, குரு, ஆட்சி தலைவர் மற்றும் தெய்வம் (இறைநிலை) இவர்களை   மதித்து  வணகி வாழ வேண்டும்." என்கிறார்கள் அம்மா.

" இயற்கை வளத்தை காக்க வேண்டும் " என்கிறாள் ஒரு மாணவி.

" ஆம். இயற்கையை அழிக்காமல் அதனோடு இயைந்த வாழ்க்கை வாழவேண்டும். அது மட்டுமல்ல, மனிதர்களால் உருவாக்கப்பட்ட, உற்பத்தி செய்யப்பட பொருட்களை வீணாக்காமலும், செதப்படுத்தாமலும் காத்து வாழவேண்டும்".

" இரண்டோழுக்கப் பண்பாட்டில் இவ்வளவு இருக்கின்றதா!" என வியக்கிறார்கள் மாணவிகள்.

" இப்படி நீங்கள் வாழ பழகிக்கொண்டால் நீங்கள் ஆன்மீக வாழ்க்கை வாழ்கின்றீர்கள் என அர்த்தம்" என்கிறார்கள் அம்மா.

" அப்பாடா! அம்மா ஆன்மீக ஆனா, ஆவன்னாவிற்கு இப்போதுதான் வந்துள்ளார்கள்!" 

" ஆன்மீகத்தைப் பற்றி நீங்கள் தெளிவாக தெரிந்து கொள்ளவேண்டும் என்பதற்குத்தான் இதுவரை பல்வேறு விஷயங்களைப் பற்றி பேசினோம்.

இனி ஆன்மீகம் பற்றி பேசுவோம்" என்கிறார்கள் அம்மா.

- தொடரும்

ஆன்மீக ஆனா, ஆவன்னா - 14

கருமையத்தூய்மை  

" நீங்கள் இப்போது கேட்டீர்களே, இதுபோல நானும் மகரிஷி அவர்களிடம் 'என்னுடைய பதிவுகள், அதுவும் மூதாதையர் பதிவுகள் பற்றி எப்படி தெரிந்து கொள்வது' என்று கேட்டபோது அவர்கள் சொன்னார்கள் - ' அது பெரிய மூட்டை அம்மா, அதில் என்ன இருக்கிறது என்பதை தெரிந்து கொள்வதற்கு பதிலாக நம் கரு மையத்தை தூய்மை செய்ய என்ன செய்யலாம் என்று யோசியுங்கள்' என்று வழிகள் சொன்னார்கள் " என்கிறார் அம்மா.

" கருமையப் பதிவுகள் அதில் உள்ள களங்கங்கள் பற்றி கொஞ்சம் விரிவாகச் சொல்லுங்கள்" என்று கேட்கிறாள் ஒரு மாணவி.

" நம் சிறு வயதிலிருந்து இன்று வரை நாம் செய்த செயல்களின் பதிவுகள், நம் முன்னோர்களின் பதிவுகள் மற்றும் அதற்கு முன் இருந்த விலங்கினப் பதிவுகள் எல்லாமே நம் கருமையத்தில் உள்ளன. இந்த பதிவுகளுக்கு ஏற்ப நாம் சிந்திக்கின்றோம், செயல்படுகின்றோம் மற்றும் நம் பதிவுகளுக்கு ஏற்ப வரும் விளைவுகளையும் அனுபவிக்கின்றோம்" என்று அம்மா சொல்லிக்கொண்டிருக்கும்போது  ஒரு மாணவி குறுக்கிட்டு

" நான் இதுவரை நல்லவளாக நடந்து கொண்டிருக்கின்றேன். என் கருமையம் தூய்மையாக இருக்கும் அல்லவா " என கேட்கிறாள்.

" மகரிஷி சொல்கிறார்கள் - நம்மிடையே இருக்கும் எண்ணற்ற நிறைவு பெறாத ஆசைகள், உள்ளொன்று வைத்து புறமொன்று பேசும் பழக்கம், பேசும் பொய்கள், பிறர் மனம் வருந்தும்படி பேசுதல், செய்தல், பிறர் பொருள் கவர்தல், பிறரின் வாழும் சுதந்திரத்தைக் கெடுத்தல், நம்மிடையே உள்ள சினம், பகை, வன்முறை, வஞ்சம்,  தன்  முனைப்பு, வேண்டாத ஆறு குணங்கள், பெண்களை வருந்தவிடுதல், வீண்செலவு, சோம்பல் என நாமே நம் கருமையத்தைக் களங்கப் படுத்திக்கொண்டிருக்கின்றோம்."

" இவ்வளவு பதிவா?" என்று மலைக்கிறாள் ஒரு மாணவி.

" நம் மூதாதையர் பதிவுகள் பற்றி சிந்தித்தால் இன்னும் மலைத்துப் போவீர்கள்.மனிதஇனம் தோன்றி கோடிக்கணக்கான ஆண்டுகள் ஆகிவிட்டன. அதற்குமுன் விலங்குகளாக இருந்த பதிவுகளும் நம்மிடையே உள்ளன. அதனால்தான் மகரிஷி அவர்கள் இதை எல்லாம் திரும்பி பார்க்காமல் கருமையத் தூய்மைக்கான முயற்சிகளில் நம்மை ஈடுபடுத்தி இறையுணர்வு பெற பயிசிகல் தந்துள்ளார்கள்."

" கொஞ்சம் விளக்கமாகச் சொல்லுங்கள் " என்கிறார்கள் மாணவிகள்.

" மகரிஷி சொன்னதை உங்களிடம் பகிர்ந்து கொள்கின்றேன். நம் கருமையம் பதிவுகளால் காபி டிகாஷன் போல கன்னங்கரேல் என இருப்பதாக வைத்துக் கொள்வோம். அதை தூய்மையாக அதாவது வெண்மையாக மாற்ற என்ன செய்ய வேண்டும். அதில் தூய பால் ஊற்றிக்கொண்டே வரவேண்டும். இங்கே தூய பால் என்பது பிரதிபலன் எதிர்பாராது சமுதாயத்திற்கு, துன்பப்படுபவர்களுக்கு நாம் செய்யும் தொண்டே ஆகும். இப்படி செய்ய, செய்ய டிகாஷன் கலர் வெளுத்துக்கொண்டெ வரும். ஆனாலும் காபி வாசனை இருந்துகொண்டே இருப்பது போல நம் பதிவுகளுக்கேற்ப விளைவுகளும் எழும்.அவரவர் கருமையப் பதிவுகளுக்கேற்ப பெரிய துன்பங்கள் சிறியதாக மாறும், சில பதிவுகள் செயலுக்கு வராமலே நீங்கிவிடும். எனவே நீங்கள் உங்களால் முடிந்த அளவு தொண்டு செய்து வாருங்கள்" என்கிறார்கள் அம்மா.

" எளிமையான வழிகள் இருக்கின்றனவா? " என கேட்கிறாள் ஒரு மாணவி.

" ஓ! அதைதான் இரண்டொழுக்கப் பண்பாடாகத் தந்திருக்கின்றார்கள் மகரிஷி அவர்கள். உங்களுக்குத்தான் அது தெரியுமே. எல்லோரும் சேர்ந்து சொல்லுங்கள் பார்க்கலாம்" என அம்மா சொல்ல அத்தனை மாணவிகளும்

" நான் எனது வாழ்நாளில் யாருடைய மனதுக்கும், உடலுக்கும் துன்பம் தரமாட்டேன்

துன்பப்படுபவர்களுக்கு என்னால் முடிந்த உதவிகளைச் செய்வேன் "

என சொல்கிறார்கள்.

"மனிதப்பிறவியின் உயர்மதிப்பை உணர்ந்து, மதிப்பளித்து, ஒருவருக்கொருவர் அன்பையும், கருணையும் காட்டி அமைதியோடும், மகிழ்ச்சியோடும் வாழ இந்த இரண்டொழுக்கப் பண்பாடைத் தொடர்ந்து கடைபிடியுங்கள். சிலநேரங்களில் சிரமமாகத் தெரிந்தாலும் கருமையத்தூய்மை மூலம் இறைநிலை அடையப் போகின்றோம் என்ற அயராத விழிப்புநிலையில் நிற்கப் பழகிகொள்ளுங்கள்." என்கிறார்கள் அம்மா.

" நிறைய புது விஷயங்கள் தெரிந்துகொண்டோம் " என்கிறார்கள் மாணவிகள்.

" கருமையம் என்பது பிரபஞ்ச பரிணாமச் சரித்திரம் முழுமையாக அடக்கம் பெற்ற தெய்வீகப் பெட்டகமாக மனிதனிடம் அமைந்துள்ளது. அப்படியானால் இந்த பெட்டகத்தை எவ்வளவு தூய்மையாக வைத்திருக்கவேண்டும்?  இதற்கான பொறுப்புணர்ச்சி உங்களுக்கு ஏற்பட்டுவிடவேண்டும் " என   அம்மா சொல்ல அத்துணை மாணவிகளும் உறுதி கொள்கின்றனர்.

 " வேறு என்னென்ன வழிகளால் கருமையத்தை தூய்மை செய்யலாம்? " என மாணவிகள் கேட்கின்றனர்.

                          -  தொடரும் 

ஆன்மீக ஆனா, ஆவன்னா - 13

கருமையத்தூய்மை 

" ஆன்மா என்றால் நாங்கள் வேறு ஏதோ ஒன்று என்று அல்லவா நினைத்துக் கொண்டிருக்கின்றோம்" என வியப்புடன் மாணவிகள் சொல்ல, அம்மா மேலும் தொடருகிறார்கள் -

" ஆன்மா என்ற சொல்லுக்குத்தான் ஒவ்வொரு மதத்திலும் எத்தனை, எத்தனை விளக்கங்கள்! இவை நமக்கு மிகுந்த குழப்பத்தைத்தான் ஏற்படுத்துகின்றது. மகரிஷி அவர்கள்தான் கருமையம் என்ற சொல்லின் மூலம் விஞ்ஞானரீதியாக  ஆன்மாவை எளிதாக விளக்குகின்றார்கள்.
இன்றைக்கு நீங்கள் பாடங்களில் ஜீனோம் என மரபு பதிவுகள் பற்றி படித்திருப்பீர்கள்..இதுமாதிரிதான்  நம் கடந்தகால வாழ்க்கையில் பெற்ற அனுபவங்கள், நம் முன்னோர்கள் பதிவுகள் என எல்லாம் காந்தபதிவுகளாக   ஆன்மாவில் அல்லது கருமையத்தில் சேர்ந்துவிடுகின்றன. சுருக்கமாகச் சொன்னால் ஆன்மா என்பது காந்த அலைப் பதிவுகள் கொண்ட கருமையம் எனலாம். 

மகரிஷி சொல்கிறார்கள் - 

ஒருவர் பிறந்து மூன்று வயது முதல் இன்றுவரை எண்ணிய எண்ணங்கள், சொல்லிய சொற்கள், செய்த செயல்கள் அத்தனையும் கருமையத்தில் மேலடுக்கு பதிவுகளாக உள்ளன. இவைகளை வினைப் பதிவுகள் எனவும் சொல்லலாம். மேலும் பின்னோக்கிச் சென்றால், அவரது பெற்றோர்கள், அவர்களது முன்னோர்கள், விலங்கினம், நான்கறிவு ஜீவன்கள், மூன்றறிவு உயிரினங்கள், இரண்டறிவு புழு வரை வந்த , செய்த செயல்கள் எல்லாமே கருத்தொடரால் கருவமைப்புப் பதிவுகளாக மனிதனிடம் கருமையத்தில் பதித்துள்ளன. சிற்றுயிரிலிருந்து  
சிறப்பு நிலையிலான மனிதன்வரையில் தன்மாற்றம் அடைந்த ஜீவ இனச் சரித்திரக் குறிப்பு பெட்டகம்தான் கருமையம் ஆகும். கருமையம் என்பது பிரபஞ்ச ரகசியங்கள் அனைத்தும் அடங்கிய தெய்வீக நீதி மன்றம்  எனவும் சொல்லலாம். "

மாணவிகள் ஆர்வத்துடன் கேட்டுக்கொண்டிருக்கின்றனர்.

" நாம் எந்த செயலையும் நம் உடலில் உள்ள  பத்து இந்திரியங்கள் மூலமாகத்தான் செய்கிறோம். நாம் செய்யும் செயலினால் ஏற்படும் அதிர்வுகளும். இன்ப,துன்ப உணர்வுகளும் கருமையத்தின் தன்மையாக மாறிவிடும்" என அம்மா சொல்லிக்கொண்டிருக்க ஒரு மாணவி 

" பத்து இந்திரியங்கள் என்று சொன்னீர்களே, அவற்றைச் சொல்லுங்கள் " எனக் கேட்கிறாள்.

" நாம் உணர்வாகப் பெறும் தொடு உணர்வு, சுவை உணர்வு, நுகரும் உணர்வு, பார்க்கும் உணர்வு மற்றும் கேட்கும் உணர்வுகளுக்கான ஐம்புலன் கருவிகள் தோல், நாக்கு, மூக்கு, கண், காது இவை ஐந்தும், தொழில்கருவிகளான கைகள், கால்கள், வாய், குதம் மற்றும் பால்குறி மொத்தம் பத்தும் பத்து இந்திரியங்களாகச் செயல்படுகின்றன. ஒவ்வொரு கருவியும் கருமையத்தில் பதிவுகளை ஏற்படுத்திக்கொண்டு இருக்கின்றன. கருமையத்தின் தன்மையும் மாறிக்கொண்டே இருக்கின்றது" என்கிறார்கள் அம்மா.

" அப்ப மூளையில் உள்ள பதிவுகள் என்ன வேலை செய்கின்றன? " என ஒரு மாணவி கேட்க,

" நன்றாக யோசிக்கிறாய். நம் செல்போனில் உள்ள மெமரிகார்டுதான்  மூளை எனச் சொன்னேன் அல்லவா... கருமையத்திற்கும், மூளைக்கும் நேரடித் தொடர்பு உண்டு. இன்னும் சொல்லப்போனால் மூளையின் மூலமாகத்தான் கருமையத்தில் அனைத்தும் பதிவாகின்றன. உடலைவிட்டு உயிர் பிரிந்தபின் மூளை செயல்படாது. மூளையை இயக்கும் ஜீவகாந்தம்தான் ( மனம்தான் ) இப்போது இல்லையே!' என்கிறார்கள் அம்மா.

"கருமையப் பதிவுகள் என்ன செய்கின்றன?" என்கிறாள் ஒரு மாணவி.

" வீட்டில் அம்மா குழம்பு செய்யும்போது அதில் பல பொருட்களைச் சேர்க்கின்றார்கள். சேர்க்கப்படும் போருட்களுக்கேற்ப அது புளிகுழம்பாகவோ, காரக் குழம்பாகவோ, சாம்பாராகவோ அல்லது மோர்க்குழம்பாகவோ மாறுகிறது அல்லவா! அதுபோலவே ஒவ்வொரு மனிதனின் கருமையமும் அவன் செய்த, செய்யும் செயல்களுக்கு ஏற்ப 
பதிவுகள் பெற்று அதற்கான விளைவுகளைத் தருகின்றன. இதைதான் செயலிலே விளைவை இணைத்த இறைவனின் திருவிளையாடல் என்கிறார்கள். இந்த உண்மைகளை மகரிஷி அவர்கள் பயிற்சிகளாகக் கொடுத்து, உள்ளதை உணர வைத்து, நல்லதை செய்ய வைத்து, அல்லதை விடுவதற்கு நம்மைத் தயார் செய்கின்றார்கள். இவற்றை நீங்கள் தெளிவாக உணர்ந்தால் யாருக்கும், எந்த ஜீவனுக்கும் எவ்விதமான துன்பமும் அளிக்கக்கூடாது என்கின்ற தெய்வீக அற வுணர்வு உண்டாகும். இதுவே உங்களின் அறிவு அடையப்போகும் முழுமைப்பேற்றுக்கு  முதல் படியாகும்" என்கிறார்கள் அம்மா.

" எனது கருமையப் பதிவுகள் எப்படிப்பட்டது? நான் எப்படி நல்ல பதிவுகளை மாத்திரம் வைத்துக்கொள்வது?" எனக் கேட்கிறாள் ஒரு மாணவி.

" பாராட்டுக்கள்!  உன்னைமாதிரியே உலகில் உள்ள அனைவரும் இந்த கேள்விகளைக் கேட்க ஆரம்பித்துவிட்டால் இன்பமய  உலகத்தை உருவாக்கிவிடலாம்! இதற்குத்தான் கருமையத்தூய்மை என்ற தலைப்பில் மகரிஷி விரிவாக விளக்கியிருக்கின்றார்கள். அவற்றைப் பார்க்கலாம்."

- தொடரும் 

ஆன்மீக ஆனா, ஆவன்னா - 12

ஆன்மா 

"  கரு மையம் பற்றி சொன்னீர்களே, இதற்கும் ஆன்மீகத்திற்கும் என்ன தொடர்பு? " என்று ஒரு மாணவி கேட்க

" நன்கு சிந்திக்கின்றாய், பாராட்டுக்கள்! மகரிஷி அவர்கள் ஒரு கவிதையில் 
'காந்தநிலை அறியாமல் கடவுள்நிலை அறிவதோ 
கருமையம் அறியாமல் அறிவினை அறிவதோ 
மாந்தராக வாழுகின்ற மாண்புடைய எவருக்கும் 
மாற்றுவழி தத்துவத்தில் விஞ்ஞானத்தில் இல்லையே!'
என்கிறார். அதனால்தான் நான் உங்களுக்கு காந்தம் பற்றியும், கரு மையம் பற்றியும் முடிந்தவரை எளிமையாக விளக்கி வருகின்றேன். ஏதேனும் புரியவில்லை அல்லது மேலும் விளக்கங்கள் தேவையானால் அவ்வப்போது கேளுங்கள்" என்கிறார் அம்மா.

" இப்போதுதான் கரு மையம் என்ற பொருளையே நாங்கள் தெரிந்து கொண்டோம். மேலும் சொல்லுங்கள் அம்மா!" என்கிறார்கள் மாணவிகள்.

" காந்த அலைகளின் திணிவுதான் நம் உடலில் கருமையமாக இருக்கின்றது. இறைநிலை பற்றி ஏற்கனவே உங்களுக்குச் சொல்லியிருக்கின்றேன் - அது காந்த  ஆற்றலாக இருப்பதினால் இறைத்தன்மைகள் அத்தனையும் கருமையத்திற்கு உண்டு.இறைநிலை போலவே இதற்கு தன்னிருக்க ஆற்றலும் உண்டு, விளக்கும் ஆற்றலும் உண்டு. மகரிஷி இதனை எளிமையான உதாரணத்தால் விளக்குவார்கள் - ஒரு பசுவைக்  கண்களால் பார்க்கிறோம். பசு எவ்வளவு பெரிதாக இருந்தாலும் அதன் பிரதிபலிப்பு நம் கண்களில் சிறியதாக ஒரு கொசு அளவிலே தெரிகின்றது. ஜீவகாந்தத்தின் மூலம் அந்த கொசு அளவுள்ள பசு உருவம் மேலும் சுருங்கி ஒரு புள்ளி அளவில் மூளையில் பதிவாகின்றது. மேலும் ஜீவகாந்தம் திணிவு பெற்ற இடமான கருமையத்திலும் இந்த பசு காட்சியும் பதிவாகின்றது.   சில நாட்கள் கழித்து  நாம் என்ன பார்த்தோம் என்று சிந்திக்கும்போது கருமையத்தில்  பதிவான பசு உருவம் ஜீவா காந்தமான மன அலைகள் மூலம் மூளை செல்களில்  மோதி பசுவின் உருவத்தை எண்ணமாக மனத்தால் பார்க்கின்றோம். நீங்கள் எத்தனை தடவை பசுவை நினைத்தாலும் கரு மையம் பசுவின் உருவத்தை விரித்துக் காட்டும். புரிகின்றதா?" எனக் கேட்கிறார்கள் அம்மா.

" நாங்கள் இதுவரை இது மூளையின் செயல் என்று நினைத்துகொண்டிருந்தோம். அப்போது மூளையின் வேலை என்ன?"  என வினவுகிறார்கள் மாணவிகள்.

" மூளை பற்றி உங்கள் பாடத்தில் நிறைய சொல்லியிருக்கின்றார்கள். சொல்லாத கரு மையம் பற்றி மேலும் தெரிந்து கொள்வோம். எனினும் நீங்கள் கேட்ட கேள்விக்கு பதிலாக நான் ஒரு கேள்வி கேட்கின்றேன். இறந்த உடலில் மூளை இருக்கின்றது. அந்த மூளையில் பதிவான எல்லாவற்றையும் விரித்துப் பார்க்க முடியுமா?" என அம்மா கேட்க 

" அது எப்படி முடியும்? உயிர்தான் இல்லையே.." என பதில் சொல்கின்றனர் மாணவிகள்.

" ரொம்ப சரி. உயிர்தான் ஜீவகாந்தமாக, மனமாக செயல்படுகின்றது என்பதை ஏற்கனவே தெரிந்து கொண்டீர்கள்.  உயிர் பிரிந்துவிட்டதால் காந்தத் திணிவான கருமையமும் உடலை விட்டு பிரிந்து விடுகின்றது. அழிவு  என்பது பரு உடலுக்குத்தான். கரு மையம் அழிவதில்லை. " என்கிறார்கள்  அம்மா.  

"அப்போது அந்த அழியாத கருமையம் என்ன ஆகும்?" எனக் கேட்கிறாள் ஒரு மாணவி.

" இந்த கேள்வியை எதிர்பார்த்தேன். இதுபற்றி 'பிறப்புக்கு முன் மற்றும் இறப்புக்குப் பின் உயிரின் நிலை'  பற்றி பேசும்போது தெரிந்து கொள்ளலாம். கரு மையம் என்பது எல்லாவற்றையும் சுருக்கிப் பதிவு செய்து வைத்துக் கொள்கின்றது. தேவைப்படும்போது பதிவுகளை   விரித்து எண்ணங்களாக மலர்த்திக் காட்டுகின்றது. இன்னும் சொல்லப் போனால் சிற்றுயிரிலிருந்து  ஆறாம்  அறிவு பெற்ற மனிதன் வரையில் மாற்றமடைந்த ஜீவ இனச் சரித்திரக் குறிப்புப் பெட்டகமே கருமையமாகும்" என்கிறார்கள் அம்மா.

" புரிகிற மாதிரி தெரியுது.   ஓர் உதாரணத்தோடு விளக்கினால் நன்றாக இருக்கும்" என்கிறாள் ஒரு மாணவி.

" இன்று நாம் எல்லோருமே செல்போன் பயன்படுத்துகின்றோம். அதில் உள்ள சிப் (சிம்  மற்றும் மெமரி கார்ட் )  போன்று நம் உடலில்  கரு மையம்.  பேட்டரியில் சார்ஜ் உள்ளவரை போன் வேலை செய்யும். நமக்கு போனில் யாருடன் பேசவேண்டும் என்பதை அதில் உள்ள பதிவுகளைப் பார்த்து தேர்ந்தெடுக்கின்றோம் அல்லவா அந்த வேலையை நம்மிடம் மனம் செய்கின்றது. மெமரி கார்ட்தான் நம் மூளை. பேட்டரிதான் உயிர்." என்கிறார்கள் அம்மா.

" நன்கு புரிகின்றது" என்கிறார்கள் மாணவிகள்.

" அப்படியானால் இந்த கருமையத்திற்கு உள்ள வேறு பெயரினை உங்களால் சொல்ல முடியுமா? " எனக் கேட்கிறார்கள் அம்மா.

 மாணவிகள் ஆர்வமாக யோசித்துக்கொண்டிருக்கும்போது அம்மா சொல்கிறார்கள் - 

" நம்மிடம் திணிவு பெற்று விளங்கும் கருமையமான காந்தம் 'ஆன்மா' எனவும் அழைக்கப் படுகின்றது. இந்த ஆன்மா என்ற காந்தத்திற்கு என்றுமே அழிவு என்பதில்லை."

மாணவிகள் சிந்திக்க ஆரம்பிக்கின்றனர்.

 - தொடரும் 

" காந்த  ஆற்றல் உட்பொருள்
   கருமையத்துட்பொருள் 
   கடவுள் எனும் இறைவெளியே "  - மகரிஷி 

ஆன்மீக ஆனா, ஆவன்னா - 11

கருமையம் 

" அம்மா, செல்கள் பற்றி ஆரம்பித்து நிறைய புது தகவல்கள் கூறியுள்ளீர்கள். ஆன்மீகத்திற்கும் இதற்கும் என்ன தொடர்பு?" என ஒரு மாணவி கேட்க 

" அண்டத்தில் உள்ளது பிண்டத்தில் உள்ளது என்பதை கேள்வி பட்டிருப்பீர்கள்தானே..இப்போது கருமையம்  என்ற ஒரு புதிய விஷயத்தை உங்களுக்குச் சொல்லப் போகின்றேன். அதற்கு அடித்தளமாகத்தான் செல்கள் பற்றி கொஞ்சம் தெரிந்து கொண்டோம். இதோ இங்கிருக்கின்றதே.. இந்த மாமரத்தின் ஆதாரம் என்ன?  அதாவது மரம் எப்படி தோன்றியது?" என அம்மா கேட்க 

" ஒரு மாங்கொட்டையிலிருந்து, செடியாகி, மரமாகியுள்ளது" என்கிறாள் ஒரு மாணவி.  

" இந்த மாங்கொட்டை எங்கிருந்து வந்தது என்று கேட்டால் இன்னொரு மாமரத்தின் வித்து என்பீர்கள். இதுபோலே உங்கள் உருவம், குணங்களுக்கு எது ஆதாரம்?" என அம்மா கேட்க 

" எனது அம்மா, அப்பா" என்கிறாள் ஒரு மாணவி.

" மிக சரி. நீ உன் அம்மா வயிற்றில் கருவாக உருவானபோதே உன் அம்மா வழி மற்றும் உன் அப்பா வழி பரம்பரை குணங்கள் எல்லாம் கருவில் பதிந்துவிட்டது அல்லவா....இன்னும் சொல்லப்போனால் ஆதி இறைநிலை முதற்கொண்டு இன்றைய நீ வரை பரம்பரை சரித்திரம் அத்தனையும் உன்னில் அடங்கியிருக்கின்றது" என்கிறார்கள் அம்மா.

" அப்படியானால் இறைவனின் குணங்களும் என்னிடம் இருக்கும்தானே..?" என ஒரு மாணவி கேட்க 

" இங்குள்ள எல்லோருமே இறைநிலையின் சொரூபங்களே! இறைநிலை தன்மாற்றம் அடைந்து, இறைதுகளாகி, விண்  முதல் பஞ்ச பூதங்களாகி, ஓரறிவு தாவரம் முதல் ஐந்தறிவு விலங்குகளாகி பின் ஆறாவது அறிவு பெற்ற மனிதன் வரை வந்த பயணத்தில் இறைநிலை குணங்கள் களங்கப்பட்டு போய் விட்டன. இந்த களங்கங்களைப் போக்கினால் நாம் இறைவனாகி நிற்கலாம்" என்கிறார்கள் அம்மா. 

" மேலும் சொல்லுங்கள், அம்மா.." என மாணவிகள் கேட்க 

"குரங்கிலிருந்து மனிதன் பிறந்தான் என டார்வின் கொள்கைகள் பற்றி படித்திருப்பீர்கள். ஒரு சிம்மத்திற்கும், குரங்கிற்கும் பிறந்தவன்தான் மனிதன் என்பார்கள் மகரிஷி அவர்கள். ஐந்தறிவு வரை வந்த விலங்கினங்களுக்கு தனக்குத் தேவையான உணவைத் தயாரித்துக் கொள்ளத்தெரியாது. இயற்கையில் கிடைப்பதை அப்படியே சாப்பிடும்.குரங்கு  சைவ விலங்காக இருந்தாலும், தனக்கு தேவையானதை தன்  இனக் குரங்குகளி டமிருந்தே 
பிடுங்கி சாப்பிடுவதை பார்த்திருப்பீர்கள். சிங்கமோ தன்  உணவிற்காக 
இன்னொரு விலங்கினை அடித்துக் கொன்று சாப்பிடும். இந்த இரண்டு விலங்குகளின் கலப்பாகத் தோன்றிய மனிதன் பிறவியிலேயே பிறர்  வளம் பறித்தல் மற்றும் பிறர் வாழும் சுதந்திரத்தை அழித்தல் என்ற கள ங்கங்களோடுதான் தோன்றியிருக்கின்றான். பகுத்தறிவு பெற்ற மனிதனுக்கு தன்  எதிர்காலம் பற்றி, தேவைகள் பற்றி சிந்தித்து செயல்பட தெரிந்திருந்தாலும் பெரும்பாலான மக்கள் விலங்குகளைவிட மோசமாக வாழ்ந்து களங்கங்களைப்  பெருக்கிக்கொண்டே போகின்றார்கள். இன்றைய சமுதாயத்தில் நாம் காணும் துன்பங்கள் அனைத்துக்கும் காரணம் மனிதர்களிடம் காணப்படும் களங்கங்களே. வித்துத் தொடராக வரும் இவற்றைப் போக்கிக்கொண்டால் மனிதன் இன்பமாக வாழ முடியும். இந்த கருமைய களங்கங்களைப்  போக்க மகரிஷி அவர்கள் எளிமையானப் பயிற்சிகள் தந்துள்ளார்கள்" என்கிறார்கள் அம்மா.

"கருமையம் என்றீர்களே, அதுபற்றி மேலும் சொல்லுங்கள்" என மாணவிகள் கேட்கின்றனர்.

" புவிஈர்ப்புமையம் பற்றி படித்திருப்பீர்கள். ஒரு பொருளின் எடை அனைத்தும் அப்பொருளின் வடிவத்திற்கு ஏற்ப ஒரு புள்ளியில் இருப்பதாக கணிக்கின்றோம். நம் பரு உடலின் மையம் எங்குள்ளது?" என அம்மா கேட்க 

"நம் அடிவயிற்றுப் பகுதி" என்கிறாள் ஒரு மாணவி.

" சரி.  உடல் முழுதும் ரத்தம் ஓடினாலும் ரத்த ஓட்டத்தின் மையம் 
இதயம்தானே..இதுபோல உடல் முழுதும் காந்த ஒட்டம் ஓடினாலும், அதற்கு ஒரு மையம் உண்டு. அதுபோல உயிர் உடல் முழுதும் ஓடினாலும் அதன் மையம் உயிரின் மூலமான ஜீவவித்துக் குழம்பு இருக்குமிடமான வித்தகம் இருக்கும் அடிவயிற்றுப் பகுதியில் இருக்கின்றது. பருவுடலின் மையம், காந்த ஓட்டத்தின் மையம் மற்றும் உயிர் மையம் எல்லாமே ஓரிடத்தில் அடிவயிற்றில் முதுகுத் தண்டு நுனியில் மூலாதாரம் என்று சொல்வார்களே அங்கே  இருக்கின்றது. இந்த இடத்தை மகரிஷி அவர்கள் 'கருமையம் ( Genetic Centre  ) என சிறப்பாக பெயரிட்டிருக்கின்றார்கள். நம் ஒவ்வொருவரின் கரு மையத்தில் ஆதி முதல் இன்றுவரை மனித சரித்திரத்தின் களங்கங்கள் அனைத்தும் பதிவாகியுள்ளன. இந்த கருமையத்தைத் தூய்மை செய்ய முடியும். அதைத்தான் மகரிஷி அவர்கள் எளியமுறை மனவளக்கலைப் பயிற்சிகளாகத் தந்திருக்கின்றார்கள்" என்கிறார்கள் அம்மா.

"மருத்துவத்தின் மூலமாக கருமையத் தூய்மை செய்ய முடியுமா?" என ஒரு மாணவி கேட்க 

" மகரிஷி சொல்லும் கருமையம் மருத்துவத் துறைக்கே புதுமையானது. இப்போதுதான் இதுபற்றி ஆராயத் தொடங்கியுள்ளனர். நாம் கருமையம் பற்றி மேலும் சில விஷயங்களைத் தெரிந்துகொள்வோம்" என்கிறார்கள் அம்மா. 

தொடரும்  

மனிதனிடம் அமைந்துள்ள கருமையம், இறைநிலையின் பேரியக்க மண்டலம் பரிணாம இரகசியங்கள் அனைத்துமடங்கிய "சூப்பர் கம்ப்யூட்டர் சிப்" என்று கொள்ளலாம். கருமையம் தான் மனிதன் அறிவுக்கும் மனதுக்கும் இருப்பிடமாக,  இயக்கக் களமாகவும் இருக்கின்றது.

- வேதாத்திரி மகரிஷி